Skvísuheimar101

Að verða fullorðinn

2012-02-06T23:34:00.005Z

Þegar ég var unglingur ætlaði ég mér að verða gullsmiður, ég sá Finnland í hyllingum og mig langaði þangað í gullsmíðanám en svo þegar útskriftin úr grunnskóla var á næsta leyti kom ekkert annað til greina en að verða stúdent af bóknámsbraut - með smá hliðarbeygju sökum unglingaveiki.

Þegar ég var 18 ára ætlaði ég að fara til Atlanta eftir stúdentspróf og læra sálfræði. Ég skoðaði skóla og fann mér enskunámskeið til að fara á. Ég ætlaði mér að eyða sumri úti og klára svo stúdentinn. Ég hætti við, keypti mér bíl fyrir peninginn og varð ófrísk. Ég hægði á mér í framhaldsskólanum og tók stúdentinn á 5 árum meðfram því að vera með Maríu litla.

Þegar ég var 21 árs ætlaði ég að verða kennari, sótti um í KHÍ og fékk ekki inngöngu - plan B var þá að fara í uppeldis- og menntunarfræði í eitt ár og sækja svo aftur um í KHÍ að ári liðnu. Ég sótti aldrei aftur um í KHÍ heldur kláraði uppeldis- og menntunarfræðina 24 ára.

Þegar ég var 25 ára ætlaði ég að verða náms- og starfsráðgjafi. Ég prufaði það nám en fann fljótt að það átti ekki við mig. Á sama tíma hafði ég mikinn áhuga á því að vinna með unglingum í vanda og elskaði vinnuna mína hjá Götusmiðjunni. Ég ákvað þá að fara í MA nám tengt því án þess að pæla endilega í því hvað ætti að verða úr því. Einhvern tímann þarna í millitíðinni fann ég áhugavert nám í Svíþjóð sem hét Child Studies, ég fann íbúð og leikskóla en þorði ekki þegar á hólminn var komið.

Þegar ég var 29 ára ákvað ég að sækja um kennsluréttindanám þar sem þá var síðasti séns að klára það á einu ári. Ég ákvað að taka smá séns og skráði mig í nám á Akureyri - ekki "heima" í HÍ.

Þegar ég varð þrítug var ég orðin grunn- og framhaldsskólakennari með BA próf í uppeldis- og menntunarfræði og MA próf í fötlunarfræði. Mig langar samt alltaf að læra gullsmíði :)

Sunnudagsblogg

2012-01-15T20:39:00.007Z

Í fyrsta skipti í ansi langan tíma var ég ein heima um helgina. Það að vera einn með sjálfum sér er stórlega vanmetið fyrirbæri, sérstaklega þegar maður hefur ekki verið mikið einn. Mamma flutti í nýja íbúð um síðustu helgi og María var á leið í frænkuheimsókn - svo voila, Hagamelsmúttan var ein heima.

----

Þegar ég kom heim úr vinnu á föstudag var ég ansi eirðarlaus, mig langaði margt og fæst af því var hægt að framkvæma svo skynsamlegt væri. Ég henti mér í sturtuna og lagðist upp í rúm, dormaði þar fram að kvöldmat milli þess sem ég kjaftaði í símann. Allt í einu fannst mér ferlega notalegt að þurfa ekki að gera nokkurn skapaðan hlut, ég druslaðist þó út í búð til að fylla á sælgætisbirgðarnar.

----

Þegar leið á kvöldið mætti "litla" frænka í heimsókn, við fleygðum okkur í sófann með nóg af kóki, snakki og nammi til að fæða heilt þorp í Afríku. Við áttum oft svona kvöld í den þegar ég bjó á stúdó og hún kom í heimsókn en undanfarið höfum við verið alltof latar (eða uppteknar) í svona kvöld. Notalegt og bara nauðsynlegt. Þegar frænka var farin valdi ég mér vælu til að horfa á - Brown Sugar - sofnaði yfir henni og gekk inn í rúm milli svefns og vöku einhvern tímann um miðja nótt.

---

Þegar laugardagurinn bankaði upp á, og ég var vakin :) - hafði ég sett mér háleit markmið fyrir daginn: fara út að hlaupa og fara í vinnuna til að klára verkefni síðustu viku. Ég gerði hvorugt heldur kveikti aftur á ræmunni sem ég ætlaði að horfa á nokkrum klukkustundum áður og fattaði að ég horfði aðeins á 17 mínútur af myndinni - úthaldið var greinilega gríðarlegt. Um miðjan dag kom María heim og múttan tók á móti henni í gervi uppvaknings, einstaklega úldin og með ljótuna á háu stigi.

---

Þegar fór að rökkva ákvað ég að skella mér í búð þar sem ég átti von á matargestum og ég þurfi að skutlast til múttu. Ég stoppaði lengur þar en ég hafði gert ráð fyrir svo að matargestirnir voru mættir þegar enn átti eftir að úrbeina kjötið, skera niður grænmeti og búa til sósu. Það kom ekki að sök þar sem eldri matargesturinn dáðist að aðförum mínum með hnífinn í eldhúsinu og hafði áhyggjur af því að ég myndi úrbeina sjálfa mig. Þegar hún svo vissi að úrbeiningarkunnáttan væri ekki frá ömmu heldur af Youtube fór hún að hafa meiri áhyggjur - óþarfa áhyggjur þar sem kjötið spratt af beininu. Yngri matargesturinn dáðist af dótturinni þar sem hún sýndi snilli sína í púsli og bara flestu á heimilinu. Þegar gestirnir yfirgáfu heimilið horfðum við mæðgur á einn þátt af PamAm - þvílík dásemd sem þessir þættir eru. Sú stutta fór svo að sofa um miðnætti en fannst það frekar snemmt.

----

Sunnudagurinn mætti okkur svo með þvílíkri sælu, ég vaknaði rúmlega 10 og sá ekki betur en að öll ljós væru slökkt og blótaði því að hafa ekki vakið barnið til að hún myndi sofna á skikkanlegum tíma. Sú stutta var aldeilis á undan móður sinni og mætt fram í stofu, mamman sá sé þá leik á borði og henti sér aftur í bólið og dormaði yfir bók lengur en góðu hófi gegnir.

---

Dagurinn í dag einkenndist af smá vinnu, smá leti, smá gelgju og smá íslenskulærdómi. Kvöldið verður nýtt í sjónvarpsgláp - með smá facebook pásum. Lífið er ljúft ;)

Gleðilegt nýtt ár!

2012-01-02T01:55:00.007Z

Við mæðgur höfum átt nokkuð gott ár. Sú eldri varð þrítug og sú yngri 10 ára. María Rún byrjaði að æfa karate í janúar hjá Karatefélagi Reykjavíkur við góða orðstýr, hún skorar reglulega á mömmu sína í armbeygjukeppni og vinnur án undantekninga. Hún hélt áfram í fótboltanum og er nú komin í 5.fl.kvk. hjá KR,. Meðfram íþróttunum spilar sú stutta á klarinett í Skólahljómsveit Reykjavíkur. Ásamt öllu þessi sinnir hún svo hefðbundnu námi í Melaskóla þar sem hún stendur sig að sjálfsögðu með prýði. Mömmunni finnst hún að sjálfsögðu fullkomið barn. Mamman lauk loksins MA náminu í fötlunarfræði ásamt því að ljúka kennsluréttindanámi við Háskólann á Akureyri. Eins og venjulega reyndum við að ferðast um landið, mamman fór reglulega í vinkonu- og námsferðir til Akureyrar fram á vorið og heillaðist enn meir af fjallaloftinu í Eyjafirði. María Rún kíkti í upphafi sumars til Spánar með ömmu sinni þar sem þær sóluðu sig, versluðu og skoðuðu allt það sem Spánn hefur upp á að bjóða. Mamman notaði tækifærið og kíkti í heimsókn á Hveravelli, og fann þar nýjan uppáhaldsstað í tilverunni. Góðir vinir fluttu til Svíþjóðar svo við gáfum okkur góðan tíma með þeim á Akureyri áður en þau flugu af landi brott, við tókum okkur svo 9 klukkutíma í keyra fyrir Tröllaskaga og vestur á Blönduós. Nokkra daga í júlí vorum við svo í gamla skíðaskálanum við Skagaströnd þar sem sögustund var afskpalega vinsæl fyrir svefininn með sögum úr sveitinni. María Rún fór svo vestur til Ísafjarðar þar sem hún var í góðu yfirlæti í Króki. Þegar fór að hausta, a.m.k. samkvæmt dagatalinu, fórum við að sjálfsögðu í réttir í elskulegu sveitinni okkar. Hápunktur haustisins var án efa skiptinám Maríu Rúnar í Höfðaskóla þar sem sú stutta fékk að prufa eina viku í fámennum skóla, æfa fótbolta með Fram og spila á þverflautu frænku sinnar. Sveitin kom sterkt inn á þessu hausti, mamman kíkti á ball á haustmánuðum sem reyndist örlagaríkt. Þar var myndarlegur bóndi úr sveitinni sem bauð múttunni upp í dans. Það er aldrei að vita nema mamman mæti með date á árshátíðina! Fyrst þarf hún reyndar að fara í dansskóla. Síðustu daga ársins vorum við í góðu yfirlæti í Hafnarfirðinum ásamt því að dúllast heima við. Okkur hlakkar mikið til að takast á við nýtt ár og vonum að það muni færa okkur gleði og lukku, og betri danskunnáttu.

Venjulegur þriðjudagur í vesturbænum

2011-11-29T19:45:00.004Z

Undanfarið hef ég pælt mikið í lífinu og tilverunni, rótleysið sem svo oft nær tökum á mér hefur náð nýjum hæðum. Einfaldleikinn heillar mig alltaf enn meir, ég sakna svo daganna á Helgamagrastræti þar sem við Magga tókum strætó í skólann og gengum heim - eða tókum heillangan rúnt í strætó. Ég slappa aldrei eins vel af og þegar ég fer til frænku og allra gemlinganna á ströndinni, nálægðin við fjöllin og sjóinn hafa svo róandi áhrif á verkefnahlaðan háskólastarfsmanninn. Það er eitthvað róandi við það að keyra yfir Holtavörðuheiðina að vetri til, í svarta myrkri og hlusta á tónlist. Sama hversu þreyttur maður er þegar maður fer af stað, það eitt að hlaupa út úr bílnum í Staðarskála hressir, kætir og bætir. En á hinn veginn þá er lika svo notalegt að geta rölt á kaffihús og fengið sér latte, fara yfir nokkur verkefni og fylgjast með sérkennilegu fólki sem gerir gáfumannlega hluti eða þykist að minnsta kosti vera að því. Það er líka svo róandi að keyra aftur og aftur niður Laugarveginn og skoða fólkið (og gluggana), stoppa hjá vinkonu og láta dæluna ganga - keyra svo aftur heim. Eða setjast hjá vinkonu og sötra bjór, taka taxa heim og rölta svo að sækja bílinn daginn eftir. Eða bara hlusta á umferðina fyrir utan gluggann - umferðina sem vekur mann á morgnana þegar maður hefur sofið yfir sig. Sumir hafa sagt við mig að það að ég leiti alltaf út fyrir borgarmörkin sé bara flótti, flótti frá aðstæðum sem ég ræð ekki við og mun ekki ráða við. Suma daga er ég sammála því, aðra ekki. Flesta daga vil ég líta svo að landsbyggðarástin sé bara sjálfsbjargarviðleitni, því einhver veginn trúi ég því að lífið sé einfaldara út á landi, tíminn sé lengur að líða og nálægðin við samfélagið meiri. Hugsanlega yrði ég að hætta innkaupaferðum á náttbuxnum en í flestum bæjarfélögum er hægt að fá latte - og ef ekki þá er tiltölulega stuttur akstur eftir latte. Pælingar á pælingar ofan. Svo langar mig líka til Stokkhólms, eða í verslunarferð til Boston.

... og 2011 er langt komið

2011-10-07T21:58:00.003Z

Kannski les þetta enginn lengur - en ég kíki sjálf hérna regulega og minni mig á hvað ég var að hugsa á hverjum tíma. Nú þegar ég skrifaði síðast var 2010 að renna sitt skeið - það var erfitt, skemmtilegt og skrítið ár. Sama á kannski við um 2011 en á annan hátt.. áramótaheitin mín voru að klára MA ritgerðina, klára kennsluréttindin, hætta að reykja og fara í ræktina. Í stuttu máli sagt þá kláraði ég blessuðu ritgerðina mína í júní, kláraði kennsluréttindin í júní, planið er að hætta að reykja í næstu viku og ég hef farið nokkrum sinnum í ræktina. Stóra spurningin í dag er samt - hvað ætla ég að verða þegar ég verð stór. Síðastliðið ár hef ég verið í frekar miklu limbói, ég á mér drauma en ég fæ mig ekki til að framkvæma þá - veit ekki hvað málið er. Ég get ekki valið á milli þess sem mig langar... það er þrennt. Fyrsti kostur er að finna mér vinnu í Reykjavík, búa á Hagamelnum um ókomna tíð, styðja litla KRinginn og verða alvöru Reykvíkingur. Vinnan þarf að vera skemmtileg og tengd því sem ég hef lært, nú hef ég kennt í HÍ frá 2006 og núna langar mig að breyta til. Mig langar í 8 tíma vinnudag fyrir góð laun og eiga góðan frítíma. Annars kostur að flytja út á land í eitthvað minna bæjarfélag en Reykjavík - Akureyrin kemur alltaf sterkt inn en þá þarf góða vinnu. Ég fer ekki neitt nema fyrir góða stöðu sem er samt pínu fáránlegt því ég er ekki með neitt sérstaka stöðu í dag - vinn á skrifstofu í hálfu starfi og kenni í hálfu starfi. Mig langar í eitt skemmtilegt starf. Ég ímynda mér að tempóið sé allt miklu þægilegra úti á landi. Þriðji kostur er að fara til útlanda í doktorsnám, sem er í raun og veru ekki kostur eins og staðan er núna. Það er á langtímaplaninu. Mig langar samt ekki í doktorsnám með annarri vinnu, mig langar í doktorsnám sem ég get stundað eins og vinnu. Lífið getur verið flókið.....

Árið 2010

2010-12-31T02:24:00.002Z

Þegar skipslúðrarnir blésu inn 2010 á Ísafirði á gamlárskvöld sá ég fyrir mér skemmtilegt ár, ár sem ég hafði lengi beðið eftir. Fátt á árinu hafði ég hins vegar getað spáð fyrir um.

---

Í upphafi árs sá ég fram á nýtt líf á Hagamelnum þar sem grunnurinn að framtíðinni væri lagður. Ég var í stjórnunarstöðu í vinnunni og ætlaði að ljúka MA ritgerðinni áður en árið væri úti, eins og svo oft áður. Framtíðin var björt og kerlingin bara þokkalega bjartsýn.

---

Árið sem er að líða var allt í senn skemmtilegt, erfitt, flókið og einfalt. Ég hélt upp á 29 árin með því að segja upp vinnunni minni og sækja um nám, þrátt fyrir að um erfiða ákvörðun væri að ræða fylgdu því mörg tækifæri - ég fékk að kenna meira en nokkru sinni áður og kynntist skemmtilegu fólki í náminu svo ég tali nú ekki um tækifærin til að heimsækja Akureyrarskvísurnar mínar einu sinni í mánuði. Ég hélt áfram í hlutastarfi á skrifstofunni við það sem mér finnst skemmtilegast, kennslumálin.

---

María ákvað að hætta í ballettinum og kórnum sem höfðu alltaf verið fastir póstar í okkar lífi, þess í stað vildi hún læra á hljóðfæri og stendur sig með sóma með klarinettuna að vopni. Hún er svo klár og dugleg þessi elska að lítið virðist stoppa hana - ég sé hana fyrir mér sem vísindamann í framtíðinni sem spilar á hljóðfæri sér til dægrastyttingar.

---

Nú stöndum við mæðgur í svipuðum sporum og fyrir 2 árum síðan, óvissan með framhaldið er óþægileg og ekki það sem lagt var með í upphafi. Sú stutta hefur þurft að ganga í gegnum miklar breytingar á stuttum tíma, eitthvað sem ég ætlaði aldrei að leggja á hana.

---

En á áramótum á maður víst alltaf að setja sér áramótaheit, ég er mikið búin að hugsa þau. Það er margt sem mig langar og sumt ég framkvæmt ein og óstudd, stundum er best að einblína á það. Áður en árið 2011 verður úti ætla ég að klára MA ritgerðina mína, klára kennsluréttindin, hætta að reykja og jafnvel skella mér í ræktina og ná af mér nokkuð mörgum kílóum.

---

Eníveis, gleðilegt nýtt ár og takk fyrir það gamla.

Drög að fyrsta niðurstöðukaflanum send!

2010-08-12T00:33:00.002Z

Jíbbý! Mér tókst að merja saman fyrsta niðurstöðukaflanum og senda hann til leiðbeinandans. Næstu skref eru að klára annan kafla en hann er um skilning og skilgreiningar á hugtakinu "skóli án aðgreiningar" sem er í raun sérstakt áhugaefni mitt :)

Meennn þetta er allt að skríða í land.. eftir 5 ár!

....

2010-08-10T20:35:00.003Z

Jæja, þá fer vonandi að líða að lokum þessarar ritgerðarvinnu. Einn kafli fer í skil á morgun (aka annað kvöld) og svo hrannast þeir vonandi inn.. og hviss, bamm og búmm - kvikyndið í prentun 10.september! Sem er nákvæmlega eftir einn mánuð - sem væri lítið mál ef ég væri ekki byrjuð að vinna og að undirbúa annað nám... en ég ætla að taka þetta með báðum og skila.

---

Verkefni vetrarins eru spennandi, talsverð kennsla, skrifstofuvinna, skóli og jafnvel rannsóknaastúderingar. Ég hlakka óstjórnlega til þegar ritgerðarskrímslið verður komið innbundið og búið. Mín tilfinning er að því fylgi óstjórnlega mikið frelsi og fullt fullt af tækifærum.

---

Annars panta ég eina lesandann minn í yfirlestur fyrstu vikuna í september :)

Það er komin nótt...

2010-08-04T02:15:00.002Z

... og ég á að vera sofandi. Einhvern veginn tekst mér samt alltaf að ná mér í betra flug þegar nóttin skellur á. Ég fór annars á fund með leiðbeinandanum mínum í kvöld, ég er nokkuð viss um að hún er einn sá besti - fundurinn fór fram á kaffihúsi í miðbænum yfir latte. Notalegt var það.

---

Annars er allverulega farið að styttast í að vinnurútínan hefjist að fullu aftur sem þýðir að spýta verður ansi fast í alla lófa til að ná þessari blessun í prentun á réttum tíma. En miðað við planið sem ég lagði upp með í dag þá getur þetta alveg gengið bara þokkalega. Hanna fær kafladrög á miðvikudag eftir viku og þá eru bara 2 - 3 kafladrög eftir (aðeins eftir því hvernig efnið liggur). Smotteríslagfæringar og þá er þetta búið - smotterís verður reyndar alltaf mikið á endanum en ég ætla að hugsa það sem smotterís.

---

Ég þoli samt ekki þegar verslunarmannahelgin er búin og veturinn nálgast, ég kvíði vetrinum pínkupons. Ég veit ekki hvort að ákvarðanirnar sem ég tók í vor voru þær réttu - ég reyni að finna Pollyönnu og komast í gegnum þetta - amk í vetur. Ef til vill átti ég bara að standa við það sem ég ákvað en ég gerði það ekki svo að ég þarf að bíta í það súra ... Ég hef þó alla vega skemmtilegu lotunar í HA til að rífa upp stemmarann!

---

Pælið samt í því hvað það verður sweet þegar október bankar upp á, 5 ár frá því ég kláraði BA og engin MA ritgerð lengur hangandi aftan á manni!

Tíminn líður...

2010-07-25T15:15:00.002Z

... og ég eldist ekki neitt. Einhvern veginn hefur sumarið farið frá mér eins og undanfarin 4 ár - eða síðan ég byrjaði á þessar elsku. Ég á svo erfitt með að halda mig við efnið og klára þetta þó svo að ég viti að verðlaunin eru mörg þegar þetta verður orðið innbundið. Ég mun hoppa hæð mína af gleði, svo mikið er víst. Það er líka alveg á tæru að ef að ég verð ekki svotil búin með þetta þegar ég byrja aftur að vinna að það fer allt á annan endann, ég hef þrjár vikur til að loka deildarstjórastöðunni svo sú skemmtilega geti getið við henni og ég byrjað í öllu þessu nýja sem ég er búin að lofa mér í. Ég hlakka samt ótrúlega mikið til vetrarins, ég hlakka til að fara norður og læra að verða kennari, ég hlakka líka til að kenna meðfram því í vetur og skipuleggja næstu skref námslega séð.

---

Meðfram ritgerðarbrasinu hef ég fengið stórgóða hugmynd af doktorsverkefni, en hugmyndin er ennþá leyndó á milli mín og kollega míns á Akureyri :) Mig langar að byrja strax og ekki seinna en í gær en til að ég eigi möguleika á því verð ég að klára þessa blessuðu ritgerð. Nýja verkefnið er samt meira í anda grunnámsins en MA námsins - en ótrúlega spennandi samt sem áður ...

---

Þessa dagana er ég að greina gögnin mín, eitthvað sem ég hélt að ég gæti gert á nótæm - en það er ótrúlega tímafrekt og krefst sjálfsaga sem mig skortir en meðfram greiningunni hef ég oft og iðulega "lent" á netinu og fundið ný gögn sem eiga það til að afvegaleiða mig ... en spennandi samt sem áður :)

---

Markmiðið núna er að klára greininguna í þessari viku og helst komast af stað með niðurstöðukaflana, skrifa þá í heilu lagi. Einhvern veginn tókst manni oft að skrifa fínustu ritgerðir á fáum dögum svo ég hef ákveðið að hugsa um niðurstöðurnar sem þrjár 20 síðna ritgerðir. Það á ekki að vera mikið mál? Eða hvað?

Það fer að smella í mánudag..

2010-05-16T22:50:00.002Z

.. og afurð helgarinnar er tæplega eitt afritað viðtal og grunnur að niðurstöðukafla. Föstudagurinn var skrítinn, eiginlega svona skólaskrítinn. Ég byrjaði daginn á því að skoða gömul viðtöl við einn aðila sem ég fór að hitta aftur á föstudaginn. Um tíuleytið skundaði ég niður í skóla og prentaði út smotterí sem ég þurfti að hafa með mér. Þeir vinnufélagar sem ég hitti ráku mig í burtu svo ég stoppaði stutt. Því næst brunaði ég niður í bæ, fann mér gott bílastæði og byrjaði að lesa - svona koma mér betur í gírinn.

---

Viðtalið gekk vel og ég brunaði aftur upp í skóla að hitta leiðbeinandann minn. Við skunduðum svo út í Þjóðminjasafn og funduðum þar. Ótrúlega ljúft og gott. Eftir fundinn skundaði ég heim og byrjaði að afrita, dauði og djöfull það. En við ræddum að sjálfsögðu um heima og geima og ég fékk mjög svo góða hugmynd við afritunina, ég hugsa að eitt þemað hjá mér verði mismunandi skilningur stjórnsýslustiga - hljómar spennó, æ nó :)

---

Næsti leiðbeinandafundur er á fimmtudag og þá er eins gott að vera komin með eitthvað bitastætt handa. Eina sem böggar mig núna er að halda mig við rannsóknarspurningar, mig langar svo mikið meira að vera út um allt og alls staðar.

Nýr dagur - nýtt viðtal

2010-05-13T23:16:00.003Z

Á morgun þarf ég að súpa seyðið af því að hafa verið svona lengi með ritgerðina mína, í bókstaflegri merkingu.. fyrir nokkrum árum tók ég viðtal við sérfræðing um löggjöfina hvað varðar skóla. Í viðtalinu vísar hann sífellt í frumvarpsdrög sem unnið er að og þær breytingar sem þær eiga að færa fram - frumvarp sem varð að lögum rétt fyrir sumar árið 2008....

---

Þann mann ætla ég að hitta á morgun, kl 11 sharp! Hlakka reyndar mikið til enda mjög fróður maður og getur eflaust sagt mér margt nýtt og kennt mér margt. Þegar viðtalinu við hann er lokið á ég eftir viðtöl við tvo krakka og foreldra þeirra og þá, ÞÁ verður gagnasöfnun lokið!!!! Ég er að gæla við það að ná sambandi við þessa krakka um helgina og ljúka þessu af. Mikið hlakka ég til!

---

Þegar ég verð komin með öll gögnin tilbúin til úrvinnslu verður svo lítið eftir þannig séð, ég er búin að greina mest allt sem ég hef safnað hingað til og það lookar bara nokkuð vel. Það sem ég þarf að gera núna er:

Taka viðtölin (5 talsins)

a. Fljótgert, erfiðast að finna tíma. Hvert viðtal tekur max klukkustund.

Afrita og frumgreina

a. Afrita er leiðinlegt og svo er ég orðin svo hægfara

b. Frumgreinining er skemmtilegt, hugurinn fer á flug. Síðast endaði ég í lagaflækjum og þá var gott að hafa löglærðan mann að læra við borðstofuborðið.

Beita túlkunafræðinni á þau

a. Skemmtilegt en tímafrekt. Mikill lestur fram og tilbaka en pælingar bæta lesturinn.

Skrifa drög að niðurstöðuköflum

a. Sjálfsagt skemmtilegt, reyndar hef ég þegar gert einn úr þeim gögnum sem ég var með 2 008 en ég nota hann aðeins til hliðsjónar í dag. Sá kafli er eiginlega ramminn af því sem mig langar að gera.

b. Fyrsti niðurstöðukaflinn verður um réttinn til náms

c. Annar niðurstöðukaflinn verður um krakkana mína

d. Þriðji verður um formlega og óformlega menntun

Updatea fræðilega hlutann

a. Sennilega hefur eitthvað gerst frá 2008 og því rétt að koma því til skila...

Updatea aðferðafræði hlutann

a. Ég þarf að máta mig betur inn í þekkingarfræðina og koma af stað vænni heilasuðu.

Fullvinna niðurstöður

Skrifa umræður

a. Klárlega skemmtilegasti kaflinn - tvinna saman niðurstöður og fræðilega hlutann

Skrifa inngang

a. Drögin eru reddí - mér hefur aldrei þótt sérstaklega erfitt að skrifa inngang

Skrifa útdrátt

a. Ekki mín sterka hlið - ég þoli ekki lélega útdrætti.

Ef til vill er þetta óþolandi blogg er það heldur mér lifandi. Það er alveg fáránlega erfitt að setjast niður dag og dag, eða kvöld og kvöld að vinna við þetta. Áður en ég veit af verður komið sumarfrí og þá á ég að vera svo til búin með þetta!

---

Það er til svo mikils að vinna að klára þetta, það felst eitthvað svo mikið frelsi í því. Ég fæ þá loks að verða "löggiltur" stundakennari en ekki á sífelldum undanþágum, ég fæ að grúska áfram með mitt og sækja svo um áframhaldandi nám.

---

Annars, þá held ég að þetta sé bara fyrir þig Valla :)

Afritun.. og aftur afritun

2010-04-23T18:04:00.003Z

Eitt það leiðinlegasta sem ég veit er að afrita viðtöl, samt finnst mér gaman að grúska í þeim þegar ég hef afritað þau en að komast í að ýta á "play" er dauði og djöfull.

---

Ég ákvað að taka mér frí í vinnu í dag fyrir ritgerðina og ætlaði að vinna daginn í dag af mér með því að vinna í gær, vinnan í gær átti að taka stuttan tíma og þegar ég fór í gær átti ég bara smotterí eftir til að klára vinnudaginn í dag. Ég ákvað því að mæta í morgun rétt aðeins til að klára verkin fyrir helgina og vera fram að hádegi í allra mesta lagi en þegar klukkan var orðin 11 og ég ekki byrjuð á því eina sem ég ætlaði að gera var nokkuð ljóst að ég myndi ekki fara heim í hádeginu - einhver veginn flæktust öll hin verkin fyrir mér og gekk út úr vinnunni rúmlega þrjú.

---

Þá var planið að bruna heim og byrja að afrita eins og enginn væri morgundagurinn. Afritunin hefur ekki gengið "sem skildi" ...

Re-connecting...

2010-04-05T16:34:00.004Z

Ég reyni og það gengur hægt.. mjög hægt að tengjast aftur blessaðri ritgerðinni. Frá því ég opnaði fileinn aftur hef ég lesið nýjar greinar og nýjar bækur - safnað í sarpinn til að update fræðilega hlutann var sem svo gott sem tilbúinn 2008. Síðasta vika hefur farið í að greina gögnin mín, gekk hægt í fyrstu.. ég var smá tíma að setja mig inn í greiningaraðferðirnar aftur. Einföld þemagreinining hefði svo sem verið fín en mig langar að fara dýpka, túlka dýpra og spá meira.

-----

Einn kosturinn við það að hafa verið 5 ár að skrifa MA ritgerð er þroskinn sem fylgir með - ég hef þroskast mikið á þessum árum og pælingarnar hafa náð lengra. Ég hugsa að ég hefði klárað á sínum tíma hefði þetta orðið hrátt og eingöngu spilað á reynslu strákanna minna, mig langar að fara dýpra núna og meira í heimspekina - hver á réttinn til náms? Hver hefur valdið? og síðast en ekki síst, hvað er réttur til náms?

----

Einn ókosturinn hins vegar að vera svona lengi er að á sama tíma og ég er að skrifa er grunnskólalögum breytt og vegamikil breyting leyfi til að reka úr skóla ótímabundið - sem var ekki í eldri lögum. Ég þarf því að endurskoða gögnin mín og við greininguna hef ég áttað mig á að ég þarf að fara amk aftur á tvo staði og taka ný viðtöl. Ég giska á að ég eigi eftir að taka 8 viðtöl til að geta lokað þessu, ca 4-5 við unglinga og rest við barnavernd, mrn og borgina.

-----

Annars sakna ég þess að hafa ekki haft áhuga á meiri heimspeki menntunar á sínum tíma, ég vil kenna leiðinlega heimspekikennaranum í Borgó um það - ég skildi ekki tilganginn í því að læra heimspeki og fannst fátt leiðinlegra. Heimspekin er samt sem áður ótrúlega merkilegt og skemmtileg ef maður leggur sig fram við að skilja hana og tengja hana við raunveruleikann.

----

Eníveis, næstu mánuðina ætla ég að pústa um ritgerðina mína - keep posted!

Soddan er nú það..

2010-03-24T22:44:00.002Z

"Ég hlakka mikið til að halda fullt af saumaklúbbum, halda pizzupartý fyrir Maríu og vinkonur hennar, opna hvítvínsflöskur og hafa það kósý. Over and out"

Þetta skrifaði ég 1.september 2009 - kvöldið áður en við fluttum inn á Hagamel... hvítvínsflöskurnar hafa verið þrjár eða fjórar, pizzupartýin hafa verið nokkur en bara tvö fyrir vinkonur Maríu og saumaklúbburinn hefur verið einn. Það eru nú engin sérstök afköst á hvað... tæpum 7 mánuðum!

Ekki það, mér finnst ég hafa alveg nóg að gera en samt langar mig svo margt. Ég bíð spennt eftir sumrinu og sumarfríinu - kerlingin sótti um bústaði hjá BHM en ég er nú nokkuð viss um að ég fæ engan í ár, frekar en í fyrra. En bara að hafa það kósý og þurfa lítið að skipuleggja dagana nema þá út frá bakstri og sólskini.. ég fíla það!

Eníveis, kannski maður eigi bara að hætta að henda einhverju hérna inn en æi.. ég veit ekki hvort ég tími þv

Jóla jóla

2009-12-14T01:14:00.003Z

Jólin skella á eftir nokkra daga - alltaf lofa ég sjálfri mér að næstu jól ætli ég ekki að hafa eins mikið að gera eins og þau síðustu. Einhvern veginn tekst mér samt aldrei að standa við það, ég er með ferlegt samviskubit gangvart Maríu að hafa ekki jólast nóg. Sú var tíðin að Ásdísin skreytti allt í nóvember - og líka jólatréð! Nú eru nokkrir dagar í jól og eitt lítið og aumingjalegt aðventuljós er í glugganum. Þessu verður bætt úr næstu daga - ferð í Sorpu plönuð á morgun, ný gluggatjöld og jólahreingerning til að hægt sé að skreyta kotið.

----

Ég er samt ekki komin í neitt jólaskap, ekki fyrir fimmaura - jólaskapið minnkar einhvern veginn með árunum held ég. Ég hlakka ekki til jólanna neitt sérstaklega nema þá bara samverunnar með fjölskyldu og vinum. Ég á eftir að sakna systu og mömmu mikið. Jólin 1999 var ég úti á Flórída og grét af heimþrá á aðfangskvöld, þar var allt svo öðruvísi - maturinn var ekki fyrr en kl 21 um kvöldið og lítil jólastemming. Jólin 2006 fór Maja til Tenerife á undan okkur mömmu, það voru með lélegri jólum - góður tími fór í símtal á milli Spánar og Íslands á aðfangadagskvöld. Jólin í ár verða samt góð, ég er alveg viss um það - en þau verða öðruvísi.

----

María er hefur litlar skoðanir á því hvað hana langar að fá í jólagjöf, þegar ég spurði hana yfir kvöldmatnum sagðist hún vilja fá Íslandsbanka ef ég myndi gefa Leif einkaþotu og þyrlu - sem er engin hætta á svo ég er nokkuð lost hvað ég á að gefa henni.

----

Enveis, stutt í að ástarpungurinn minn láti sjá sig í jólafrí ... 5 vikur eru allt í einu orðnar að örfáum dögum.

Hver er ég?

2009-11-21T00:25:00.003Z

Það er föstudagskvöld og ég sit lurkum lamin í sófanum með tölvuna í fanginu. Ég er búin að dotta svo mikið frá því ég kom heim úr vinnunni að ég get ekki sofnað. Samt langar mig að fara að sofa en einhver óþekktarangi í mér stoppar mig.

---

Lífið hefur ekki verið nein lognmolla undanfarið frekar en áður. Ég er mikið búin að spá í því hvernig lífið var og er hjá öllum hinum sem aldrei lenda í neinu, þessir "hinir" eru spennandi fólk - eða hvað? Ég er mikið búin að vera að spá í gömlu dagana undanfarið, stundum er eitthvað sem triggerar það og stundum ekki. Það eru skrítnar tilfinningar sem fylgja því að líta til baka, ýmist gleði, sorg eða jafnvel reiði. Fortíðin gerir okkur að því sem við erum í dag, það er nokkuð ljóst.

---

Annars er ég á mjög skemmtilegu námskeiði í vinnunni um samskipti stjórnenda og vinnusálfræði. Í fyrsta tímanum fylltum við út spurningalista og í dag fengum við afhent samskiptamat út frá þessum svörum okkar. Ég var nokkuð sammála því sem stóð um mig, samstarfskona mín var ekki eins sannfærð og ég. Matið var eitthvað á þessa leið: Privatlífið: Ég er opin persóna sem á auðvelt með að tjá mig, hvort sem það er á jákvæðan eða neikvæðan hátt. Ef mér finnst að mér vegið er ég fljót upp á lagið og verð reið eða sár. Fólk veit ávallt hvar það hefur mig. Starfið: Ég hef metnað fyrir því sem ég geri og vil gera hlutina vel en að sama skapi vil ég sjá árangur. Ég á almennt góð samskipti við aðra starfsmenn en ef ég fæ gagnrýni sem mér finnst ósanngjörn verð ég sár og reið innra með mér. Ég á erfitt með að setja samstarfsfólki mörk. Útávið: Í samskiptum við ókunnunga get ég falið feimni mína og hef góða þjónustulund. Ég á auðvelt með að leiðbeina fólki en mér hættir til að taka ábyrgðina af þeim.

---

Ég er sammála mjög mörgu í þessu mati en ekki öllu. Ég held til dæmis að oft gefi ég fólki ekki rétt skilaboð um það hvar það stendur en ég veit að ég er fljót upp ef mér sárnar eða ef ég verð reið. Ég er að sama skapi yfirleitt fljót tilbaka.... held ég.

---

Er þetta ég?

Now 23

2009-09-28T23:51:00.003Z

Helgin sem leið var ótrúlega skrítin - ég hef ekki átt svona helgi síðan 2008.. alls ekki að kvarta samt. Ég var lítið heima og gerði það sem mig langaði þegar mig langaði - meira að segja þá lagði ég meðan flestir hentu í sig kvöldmat á laugardaginn. Skemmtileg helgi með góðu fólki - alla dagana. Það vantaði samt einn stóran gorm - það hefði verið ótrúlega notalegt að hafa hann hjá sér, því er ekki að neita. Sunnefa reynir sitt besta að koma í hans stað :) Ég fæ knús í nóvember.. ekkert svo langt þangað til.

---

Annars er alltaf nóg að gera hjá mér, ég ákvað að taka að mér smá kennslu í vetur eftir að hafa tekið ákvörðun um það að kenna ekki neitt í vetur heldur ljúka við MA ritgerðina mína og nota allan tímann í hana. Það er bara svo gaman að kenna... ég elska það. Ég elska nemendur sem vilja læra og hafa áhuga á efninu.. ég elska "kennarasleikjurnar".

---

Eníveis, fullt sem mig langar að skrifa en ekkert sem mig langar að birta :)

Time flies

2009-09-19T23:28:00.003Z

Milli þess sem ég hrærði í tertur og dúllaði mér á facebook hef ég verið að lesa í gegnum gamlar færslur á blogginu mínu. Stundum skellti ég upp, stundum skildi ég ekki hvað ég var eiginlega að skrifa um og stundum fékk ég tár í augun. Ég er búin að blogga hérna á blogspot í fjögur og hálft ár. Fyrst þegar ég bloggaði sagði ég frá öllu sem ég gerði en smám saman hefur það þróast út í hugsanir og pælingar með daglegu ívafi.

---

Það er samt alveg ótrúlegt hvað það er fljótt að fenna yfir hinar ýmsu minningar. Til dæmis...

hef ég ekki getað drukkið neitt magn af rauðvíni síðan Valla og Addi útskrifuðust úr HÍ 2006.
Ég hitti pabba síðast í júní 2005.
Í júlí 2005 auglýsti ég eftir laganema til að lesa yfir lagakaflann í BA ritgerðinni - enginn hafði samband við mig þá :)
Í október 2005 skilaði ég inn BA ritgerðinni minni, bauð upp á 100 lítra af áfengi og skemmti mér þrælvel.
Í nóvember 2005 var ég virkilega að spá í því að skrá mig í Vinstri græna.
Í janúar 2006 byrjaði ég að vinna í tímavinnu á skrifstofu félagsvísindadeildar sálugu.
Í mars 2006 breyttist margt og við María urðum tvær í kotinu.
Í maí 2006 kvaddi elskulega amma mín þennan heim.
Í júlí 2006 fór ég í ógleymanlega ferð til Chile og heimsótti Sunnefu, saknaði Maríuhænunnar minnar mikið en naut þess samt að vera hjá Sunny.
Í september 2006 fórum við Hildur Halla á Sálarball í Mosó.
Í nóvember 2006 giftu Maja og Beggi sig.
Í janúar 2007 fór ég í 25 ára afmæli Völlunnar minnar og á þorrablót í Eyjafirði.
Í mars 2007 hitti ég Blönduósstelpurnar á Vegamótum - erum nokkrum sinnum búnar að spá í að hittast aftur :)
Í nóvember 2007 missti ég símann minn ofan í kaffibollann minn á kaffistofunni í Odda.
Í desember 2007 fór ég í ógeðslega hálskirtlatöku og flutti inn til Maju og Begga.
í mars 2008 fór ég á Mosódjamm með öllum gömlu félögunum.
Í mars 2008 fór ég með HÍ til Ísafjarðar og slasaði mig á spjaldhryggnum eftir tvær byltur í snjónum þar (sá einn sætan og féll bókstaflega fyrir honum).
Í apríl 2008 missti Stjarna gamli hamsturinn okkur einn fót.
í júní 2008 fór ég í skrallaði ég á Akureyri og svaf í lopapeysu.
Í október 2008 hófst rekstur kaupfélagsins við Eggertsgötu.
Í nóvember 2008 var ég í algjörri kleinu, týndi bílnum mínum hvað eftir annað og tók rangar ákvarðanir á sumum sviðum.
Í desember 2008 fékk ég stöðuhækkun í vinnunni.
Í desember 2008 eyddi ég út 1010 smsum úr símanum mínum.
Í desember 2008 fór ég að íhuga aftur viðskipti við kaupfélagið á Eggertsgötu
Í janúar 2009 flutti ég í 113. Í febrúar átti ég skemmtilegan mömmudag með Maríu.
Í mars 2009 fór ég með Hildi, Ingunni og Maríu í ógleymanlega sumarbústaðarferð til Akureyrar.
Í mars 2009 varð ég veðurteppt á leiðinni til Ísafjarðar og síðar í mánuðinum varð ég veðurteppt á Skagaströnd en ég byrjaði mánuðinn á því að fluginu mínu til Akureyrar var aflýst.
í maí 2009 flutti Annan mín til Akureyrar og í hjartans eigingirni grét ég heil ósköp.
Í júní 2009 fór ég með Maríu til Ísafjarðar að hitta fjölskylduna í Króki í fyrsta skiptið.
Í september 2009 stakk karlinn minn af til útlanda.

---

Eníveis, tveir unglingar sofa inn í Maríu herbergi. Planið mitt er að sofa ekki aðra nótt í sófanum. Afmælisveisla á morgun.

Wanna talk about sex?

2009-09-10T21:59:00.003Z

Dagarnir líða, karlinn í útlöndum og netið loksins komið á Hagamelinn. Einkabarnið og dekurdúllan mín á afmæli á mánudaginn, 8 ára unglingur sem óskar eftir gemsa og fötum í afmælisgjöf...

---

Barnið mitt er formlega orðið lyklabarn og er ótrúlega sátt við fyrirkomulagið. Það er mikið að gera á litla heimilinu okkar, barnið stundar fótboltann á fullu, ballettinn er að kikka inn aftur og sömuleiðis kórinn. Það var yndislegt að keyra hana á ballettæfingu fyrr í dag, beint af fótboltaæfingu. Innan um puntskó og dúllerí plantaði hún takkaskónum og legghlífunum. Gervigrasbuxurnar og sokkarnir fengu svo að hanga í klefanum með prinsessudótinu. Eftir nokkrar mínutur var gallharði KR-ingurinn orðinn ballerína með snúð í tjullpilsi.

---

Á meðan barnið æfði stíft með balletthópnum ákvað mamman að versla inn fyrir fyrsta hlutann af afmælisveislum - sá síðari verður eftir rúma viku. Það getur verið hollt að fara í búð og vita ekkert hvað maður ætlar að kaupa, þá fær hugurinn að njóta sín og stundum verður útkoman góð og stundum ferlega fyndin. Nema hvað, ég fór að velta því fyrir mér af hverju eru brauðvörur alltaf það fyrsta sem maður sér í Bónusverslun - það vita það allir sem versla og hafa smá rökhugsun að ef þú setur brauð neðst í körfuna þá verður það ansi kramið ef þú heldur áfram að hlaða ofan á það!

---

Ég gekk um búðina, fór sömu gangana aftur og aftur og reyndi að muna hvað ég ætlaði að kaupa. Ég gafst upp eftir dágóða stund og ég held ég hafi keypt allt sem mig vantaði nema tómatsósu og mjólk. Ég meina hver þarf tómatsósu og svo er mjólk ekkert svo holl. Barnið pantaði pizzur og Hello Kitty köku á la mamma. Mamman ætlar að verða við þeirri beiðni aðfararnótt sunnudags - á sama tíma og hún ætlar að tæma síðustu kassana og finna leið til að koma 16 stelpum í sæti.

---

Eníveis, plan helgarinnar er að draga nokkra lambskrokka í sveitnni og halda svo stelpupartý í borginni - Er ekki helgin bara 2 dagar?

The blogger is in da house

2009-09-01T00:08:00.004Z

"Samband stendur í blóma! Þú ert kominn yfir það að vilja einhvern annan til að breyta til og tekur þessari manneskju einsog hún er " segir í stjörnuspánni hans Leifs fyrir daginn í dag og já hann er farinn til Hollands - án mín, sambandið er algjörlega í blóma :)

---

Frá því ég keyrði rófuna mína á völlinn hef ég verið að spá í síðasta ári - stundum truflar rykið í augunum :) Það er spaugilegt að hugsa til þess hvernig hlutirnar hafa æxlast og yndislegt í ofanálag. Fæðingin var löng með smá hríðarstoppi um tíma en svo fór allt að blómstra. Fyrir ári síðan var ég út um allt og alls staðar, nýlega komin með facebook og njósnaði reglulega um gaurinn sem var að skrifa fyrri hluta fræðikenninga sinna með Scooter við eyrað - ég hélt alltaf að statusinn væri djók, ég gat ekki ímyndað mér að nokkur maður hlustaði á Scooter. Ekki fyrir svo löngu komst ég að því að maðurinn hlustar á Scooter! Ég sakna hans ;(

---

Annars erum við mæðgur að fara að flytja - stefnan er tekin á að sofna á nýjum stað annað kvöld. Ég hlakka mikið til að halda fullt af saumaklúbbum, halda pizzupartý fyrir Maríu og vinkonur hennar, opna hvítvínsflöskur og hafa það kósý. Over and out

Sunnudagsblogg

2009-06-21T21:42:00.004Z

Einu sinni var alltaf hægt að treysta á það að ég bloggaði á sunnudagskvöldum og stundum á fimmtudögum - undanfarið hef ég bara bloggið minna en ekki neitt. Reyndar hafa bloggfærslunar alveg orðið til í huganum undanfarið en einhvern veginn hefur enginn þeirra komist í birtingu - sumar hafa bara verið saveaðar sem draft :)

----

Ég er búin að gera ótrúlega margt síðan síðast. Við María skelltum undir okkur Subaru og brunuðum vestur á Ísafjörð um hvítasunnuhelgina, María vildi ekki fara heim og óskaði eftir því að næst yrðum við í mánuð! Við nutum þess í botn að vera hjá góðu fólki og slógumst um athygli frá Leifi :) Helsta afrek þeirrar ferðar var þó aksturinn yfir Hestakleifina. Á vesturleið ákvað ég að keyra fyrir Reykjanesið, það var svo sem fínt - sól og malbik að stórum hluta eftir rigningu og drullu í langan tíma. Á leiðinni heim horfði ég upp á blessað fjallið og svitnaði, mig langaði að stytta mér leið og fara yfir. Ekki nema sex ökutæki tóku framúr mér og fóru af stað upp fjallið, ég stoppaði út í kanti - fór út úr bílnum og úr jakkanum, svalaði nikótínþörfinni og hélt af stað upp fjallið. Ég talaði ekki mikið við Maríuhænuna mína sem hlustaði á Drekasögur á repeat heldur var munnurinn lokaður, augun á veginum (passaði að horfa ekki niður) og hendur á stýri (tíu mínútur í tvö staðan). Ég komst upp án þess að svitna mikið. Þegar upp var komið stoppaði ég og hleypti umferðinni framúr mér. Að komast upp fjallið var bara smotterí miðað við að komast niður - ekki einu sinni hálfur sigur! Þegar vegurinn fór að halla aftur niður í næsta fjörð var bíll settur í beinskiptingu og ég juðaði honum niður á 20 km hraða. Ég svitnaði og svitnaði en hafði það niður á endanum. Ég rétti hendina aftur og bað Maríu um að gefa mér High five, hún spurði bara afhverju og fannst lítið til koma um þetta afrek móður sinnar. Mamman var aftur á móti að rifna úr stolti :)

---

Þegar við komum í bæinn tók við þetta venjulega, vinna og skóli. Ég fór í vinnuferð til Stokkhólms þar sem ég fékk langtímalækningu á utanlandasýkinni sem ég hef haft. Við funduðum alla daga en seinni part dags gátum við gengið aðeins um og skoðað - ég hlýddi Sigurbjörgu að sjálfsögðu og fór að skoða Vasasafnið.. geðððveikt. Á meðan ég var úti kláraði skottan mín skólann sinn með glæsibrag að sjálfsögðu, hún fékk A í öllu og les 228 atkvæði á mínútu - um jólin las hún 170 atkvæði. Stolta mamman varð pínu meyr að vera ekki á staðnum á þessum tímamótum hjá skvísunni en never again :)

---

Það styttist óðum í sumarfríið mitt - tvær vinnuvikur eftir og frúin komin í frí í 4 vikur. Bara kát með það - ég hlakka svo til að vera með skvísunni minni og gera allt og ekkert. Fara í bíltúr af því bara. Það myndi svo ekki skemma fyrir ef Leibbinn minn verður eitthvað á þurru landi á þessum tíma svo við mæðgur getum barist um athygli frá honum. Ég vildi óska að hann væri að vinna skrifstofuvinnu í REYKJAVIK í sumar :) Ég sakna hans ótrúlega mikið ...

---

Eníveis, ég bíð spennt eftir milljónunum sem ætla að skríða inn um gluggann hjá mér eina nóttina - þangað til kúri ég í kjallaranum í foreldrahúsum :)

Sumar, sumar, sumar og sól

2009-05-17T23:38:00.004Z

Temmilega langt síðan síðast.. bloggandinn hefur bara ekki komið yfir mig í langan langan tíma - kannski bara af því að sunnudagskvöldin eru yfirleitt bókuð í eitthvað annað :)

---

Einhvern veginn hefur tíminn staðið í stað undanfarna mánuði, mér finnst eins og janúar hafi verið í síðustu viku og svo langt í að að ég sé að fara að flytja aftur. Það hefur mikið gerst á þessum mánuðum, ég hef þurft að endurskoða ýmislegt og breyta ýmsu - það var bankað á öxlina á mér og samstarfsfélagi minn benti mér réttilega á að sumt væri verðmætt - annað dýrmætt og það ætti maður að passa. En það er að koma sumar eða er komið sumar. Tjaldvagninn er kominn heim og útilegutærnar mínar eru að komast í stuð. Mig langar að vera í útilegum í allt sumar - mig vantar bara útilegufélaga, endilega bjóðið ykkur fram :)

---

Svo er Annan mín að flytja norður, ég get í hjartans eigingirni sagt án þess að blikka að mig langar ekkert að hún flytji - en það er bara eigingirni sem ég verð að eiga við mig :) Ég á eftir að sakna hennar alltof mikið - Valla og Anna báðar á Akureyri.. spurning um að skella sér bara líka? Það verða pottþétt nokkrar Akureyrarferðirnar í sumar, ein fótboltaferð, ein ferð í brúðkaup og svo vonandi bústaður og bara heimsóknir...

---

Það er komið samt svona eirðarleysi í mig, mig langar að setjast upp í bílinn og keyra af stað, bara eitthvert - kaupa ís og halda svo áfram. Stoppa einhvers staðar og fara sund. Fara svo heim, grilla og sötra hvítvín. Mig langar að stökkva á ferð til útlanda - ég býð spennt eftir því að vinna í lottói, þrátt fyrir að taka ekki þátt þá finnst mér alveg komin tími á að vinna.

Fögur er hlíðin.. og svo asskoti hál

2009-03-30T21:42:00.004Z

... já eða svona allt að því. Tvær giftar húsmæður úr Reykjavík og dramadrottning í foreldrahúsum lögðu af stað sl föstudag norður yfir heiðar til að hitta Maríuna okkar, húsmóðirna á Laugum. Sem betur fer ákváðum við nú að fá far í Fokker50 og skildum drossíurnar eftir heima.

---

Undirbúningur ferðarinnar gekk svo glimrandi vel að ég gleymdi að bóka íbúð fyrir okkur svo við vorum í bústað í staðinn. Þrátt fyrir smávægileg mistök var mér treyst til þess að koma með hrásykurinn, sem ég gleymdi og mamma brunaði vestur í bæ með handklæði og rúmföt rétt fyrir flug þar sem ég gleymdi því líka. Og bara svona til að toppa skipulagshæfileikana mína þá tók ég að mér að panta borð á Strikinu um kvöldið.. ég bókaði okkur kl 19.30 - vélin fór frá Reykjavík kl 19.15 svo ljóst var að við myndum ekki ná því.

---

Á föstudag var unnið eins og reglur segja til um til rúmlega fimm, skottan kíkti í stutta heimsókn fyrir flug í litla kotið á Eggertsgötunni en mætti svo tímanlega, aðeins á eftir Hildi og Ingunni upp á flugvöll - ég hef aldrei skilið þetta hálftíma- mál með innanlandsflug.. bara illa farið með tíma.

---

En að Akureyrinni, við þrjár lentum á Eyrinni á góðum tíma og biðum eftir töskunum þegar við áttuðum okkur á því að engin okkar hafði beðið Maríu um að sækja okkur á völlinn - með krosslagða fingur og hreina sál biðum við eftir því að sú fagra kona mætti á flugvöllinn, sem hún gerði þessi elska.

---

María fékk lánaða drossíu frá systu sinni, drossí sem María keypti þegar hún var 16 ára. Eftir matinn á Strikinu var ferðinni heitið í Kjarnaskóg.. stuttu eftir að farartækið fór af stað brotnaði rúðuþurrkan - redduðum því með því að skella henni á gólfið við farþegasætið. Ferðinni var haldið áfram eftir smá hlátur.

---

Ingunn tók við fararstjórn, ferðinni var heitið inn í Kjarnaskóg. Samkvæmt skipun úr aftursætinu átti að taka fyrstu brekkuna inn í Kjarnaskóg "á ferðinni, ekki þenja bílinn of mikið en ekki slá af heldur" - það gekk eftir upp fyrsta hallann. Spennan var yfirþyrmandi.. drossían dreif og taktfastar hreyfingar farþeganna hjálpuðu eflaust til. Næsti halli var ekki eins "auðveldur" yfirferðar, þegar drossían komst ekki lengra þar ákváðum við María að fara út að ýta og Hildur tók við akstrinum. Þrátt fyrir háa hæla, mikinn hlátur, enga vettlinga og vætu í brókinni haggaðist bíllinn lítið sem ekkert - nema þá í öfuga átt. Stelpukvikindi á nýjum bíl brunuðu fram úr okkur og Hildur bakkaði niður brekkuna, með smá pælingum var þessi líka tekin á ferðinni og kagginn brunaði upp eins og á góðum sunnudegi.

---

Við fundum bústaðinn mjög fljótlega, gula slangan var aftur á móti ekki eins auðfundin. Vatn fékk að leka í pottinn, mortélið spratt upp úr töskunum og Hildur tók sig til við að blanda mojito og ég opnaði GTR beljuna sem baulaði svo fallega í ísskápnum. Allt í einu var föstudagurinn úti og þreyttar kerlingar lögðust í bælið - sumir hvíldu sig þó í sófanum :)

---

Á laugardagmorgun kom Hnikarr færandi hendi með krúttsprengjuna og bakkelsi í morgumat/hádegismat. Krúttsprengja fékk handsnyrtingu hjá mér og sturtaði nokkrum sinnum niður í klósettinu áður en skvísurnar þrjár lögðu í bæinn til að kaupa vistir ... og komust á útsölur. Tvær peysur, kaffi og kaka á Bláu könnunni og kaffi og spjall í Vanabyggðinni var afrakstur dagsins ásamt ýmsu öðru nauðsynlegu.

---

Laugardagurinn var ekki kraftminni en föstudagurinn þrátt fyrir að komast upp í bústað í fyrstu atrennu - potturinn skítkaldur fyrstu 2 tímana eins og fyrra kvöldið, en heitu kjéllingarnar héldu honum alveg nógu góðum :) Á sunnudeginum var klukkan rétt um hálftvö þegar létt ryðgðar vinkonur héldu til byggða - sumir á kaffihús, aðrir í mömmukaffi. Bústaðurinn var tæmdur og þrifinn og beðið eftir flugi.

Sá handlagni

2009-03-23T22:27:00.002Z

Á hverju heimili er nauðsynlegt að hafa einn handlaginn - bara svona til að dytta að því sem þarf þegar þarf. Einhvern veginn virðist þetta hlutverk oftar en ekki detta inn hjá karlkyninu sama hvaða hæfileika hann hefur.

---

Ég þekki einn svona "handlaginn". Fyrir mörgum árum þegar María var nettur bumbubúi bilaði klósettkassinn í Leirubakkanum, sá handlagni tók sig til og "lagaði" kassann. Viðgerðin fólst í því að fyrir hverja ferð þurfti að skrúa frá krananum í kassann, bíða smá stund og skrúfa svo fyrir þegar búið var að sturta. Annað dæmi er þegar kraninn frá þvottavélinni lak, viðgerðin fólst í því að skella handklæðum utan yfir kranann...

---

Undanfarið hafa flest raftæki í eldhúsinu hér í sveitinni gefið upp öndina, tilviljun veit ég ei en frá því ég flutti inn um áramót hefur kaffivélin hætt að mala, uppþvottavélin höktir og á það til að skilja eftir vatn í tíma og ótíma, hraðsuðuketillinn er dauður og spaneldavélin gaf upp öndina rétt í þessu.

---

Sá handlagni ætlaði að losa helluborðið og koma því í viðgerð. Barnabarnið fylgdist spennt með konurnar á heimilin biðu eftir slysi. Helluborðið fór af eftir smá svona dúllerí. Kona hins handlagna sá sig knúa til að minna hann á að slá út rafmagninu fyrir helluborðið sem hann taldi sig nú hafa gert. Konan taldi þá málið í nokkuð öruggri höfn og lagði sig með blöðin inn í rúmið. Stuttu síðar varð allt svart og frúið gólaði úr rúminu: "Er í lagi með viðgerðarmanninn?". Jú, hann var hress, helluborðið laust og ekkert rafmagn á efri hæð hússins.

---

Þegar sá handlagni hafði gengið frá vírum og slegið rafmagninu aftur inn fór ég inn á bað, ég hafði lagt húfu af barnabarninu í bleyti og ætlaði að losa um tappann í vaskinum. Ekkert gekk svo ég kallaði á konu hins handlagna.. jú það er ekki að spyrja að því, vaskurinn stíflaðist fyrir einhverjum misserum síðan svo hinn handlagni þurfti að losa vatnslásinn... í miðri viðgerð lenti tappinn í hnjaski og hefur ekki virkað síðan.

Lífið og tilveran..

2009-03-22T23:19:00.003Z

Tvær vikur án bloggs er langur tími.. mig hefur oft langað að blogga undanfarið en um hvað? Vitur maður sagði mér bara að blogga um lífið og tilveruna... Lífið er skemmtilegt og tilveran sömuleiðis.

---

Síðan ég bloggaði síðast hef ég heimsótt Akureyri, Egilsstaði og Ísafjörð. Á Akureyri hitti ég Völluna mína, sötraði hvítt, borðaði gott pasta og sötraði smá kaffi yfir löngu tímabæru spjalli. Daginn eftir kynnti ég Félagsvísindasvið með aðstoð tveggja laganema - gekk bara nokk vel. Þaðan fórum við á Egilsstaði, tókum eina hæð á hótelinu og fengum nettan valkvíða yfir matseðlinum á hótelinu - skyldi það verða lamb eða fiskur... daginn eftir var skólinn aftur kynntur fyrir Austfirðingum.

---

Svo kom helgin, á sunnudeginum ætlaði ég til Ísafjarðar - en eins og oft þegar ég er á ferðinni undanfarið.. þá var ófært. Titrandi af reiði fékk ég far með fyrstu vél á mánudag, kynnti skólann og sjálfa mig með fínasta laganema mér við hlið.

---

Svo kom aftur helgi, á föstudag var árshátíðin - laganeminn var kynntur fyrir samstarfsfólki, stóð sig með prýði. Laugardagur var letidagur. Sunnudagur var fjölskyldudagur með laganemanum og mínu uppáhaldsfólki - gekk líka nokk vel :)

Svaðilför ti Skagastrandar

2009-03-10T00:07:00.002Z

Eitt kvöld á facebook ákvað ég að síðasta helgi væri snilldarhelgi til að kíkja norður til Rögnu á Skagaströnd. Anna Maja var alveg sammála mér svo að á síðasta föstudag ókum við norður í land með Maríuhænuna mína í aftursætinu. Ferðin gekk áfallalaust fyrir sig þar til við komum í Borgarnes (alla leið í Borgarnes), þá áttaði ég mig á því að drossían var ljóslaus. Vitandi það að ekkert bílaverkstæði í Borgarnesi væri opið ákvað ég að láta slag standa og keyra með háa settið norður, því jú gáfumennin á bensínstöðinni minni höfðu eitt sinn sagt mér að þeir skiptu ekki um þessar perur þar sem of mikið þyrfti að losa frá.

---

Í Norðurárdalnum var orðið ansi dimmt og ljóst var að háa settið mitt var að blinda ansi marga ökumennina, því ákvað ég að reyna að "semja" við afgreiðslufólkið í Staðarskála um peruskipti. Þjónusta N1 á landsbyggðina er algjörlega til fyrirmyndar.. NOT - þar er ekki þjónusta á kvöldin úti á plani. Hvað á það eiginlega að þýða? En jæja, inn í skálann arkaði saklaus borgarmær í ullarkápu og á háum hælum og spurði hvort það væri nokkur sem gæti aðstoðað hana. Það var ekki að spyrja að því, grillmeistarinn skellti af sér svuntunni, fór í úlpu og kom út. Hann náði annarri perunni en þorði ekki að reyna við hina.

---

Stuttu síðar héldu stoltir ljósaeigendur áfram út í myrkrið. Rétt við Hvammstanga minntist mín kæra frænka á síðasta ferðalag okkur um Húnvatnssýslurnar - fyrir nokkrum árum þegar ég varð Blönduóslöggunni að bráð. Það var ekki að spyrja að því, þegar við renndum í gegnum Blönduós stoppaði þessi elska okkur. Drossían eineygð, ég eldrauð í framan eftir gullin komment frá frænkunni og frænkan í hláturskasti...

---

Við lentum loksins á Skagaströnd seint á föstudag, Birta tók á móti okkur og spurði um Ottó. Gormarnir léku sér fram á kvöld og frænkan fór heim í sveit. Við Ragna sötruðum kók og kjöftuðum - styttra en venjulega. Laugardagurinn gekk í garð, ég svaf á mínu græna á meðan Ragna hugsaði um öll dýrin á heimilinu, madamman úr Reykjavík vaknaði ekki fyrr en rétt fyrir tólf og gekk upp stigann með samviskubit dauðans.

---

Eftir hádegi ákváðum við að fara út á rúntinn - skoða plássið ;) Við tókum smá rúnt í blíðskaparverði með börnin í aftursætunum - allir hressir og glaðir að borða nammi, nema Birta hún var komin með í magann. Allt í einu varð kolvitlaust veður. Skynsamar mæður héldu þá heim og bílnum var lagt snyrtilega í skúrnum. Veðrið vesnaði þegar leið á kvöldið og um tíma sást ekki einu sinni til kannabisverksmiðjunnar sálaugu - ekki skrítið að vinnslan gat farið svona leynt ef veðrið verður oft svona.

---

Anna Maja lét sig hafa það að kíkja á okkur í stutta heimsókn þrátt fyrir blindbyl, á heimleiðinni gekk ekki betur en svo að bíllinn fór út af með dömuna innan borðs. Allir gengu þó heilir af velli nema þó ekki væri nema sært stolt frænku.

---

Sunnudagurinn gekk í garð heiður og fagur. Allt á kafi í snjó og logn úti. Við frænkur bjuggum okkur til brottfarar og sennilega um leið og við skelltum bílnum í "Drive" fór að hvessa. Við létum okkur nú hafa það, keyptum vistir í N1 og fylltum bílinn. Í Vatnsdalnum hringdi frænka í Vegagerðina og tók stöðuna á heiðinni, þar var hálka og stórhríð - og fólk beðið um að vera ekki á ferðinni. Miðað við umferðina suður ákváðum við að láta sem hún hefði aldrei hringt. Bylgjan ómaði í bílnum og við skemmtum hvor annarri með því að búa til veðurfréttir.. VNA 18 metrar á sekúndu, skyggni 2 stikur...

---

Einhvers staðar á leiðinni heyrðum við fréttir .. þar sem heiðinni var lokað, björgunarsveitir komnar upp aðstoða fólk og fólk beðið um að halda sig heima við. Frænkurnar ákváðu því að snúa við rétt vestan við Hvammstanga. Heimleiðin á Skagaströnd tók svo tæpa 2 tíma, geri aðrir betur!

---

Það var svo í morgun að frúin skellti sér í dreifbýlisskóna, snjóbuxur, úlpu og húfu og óð skafla að bílnum sem fékk að eyða nóttinni við Apótek bæjarsins. Rétt fyrir níu vorum við komnar á fullt skrið til borgarinnar, sóttum meiri vistir í N1, fylltum bílinn og tókum myndir af ísbirninum.

---

Í stuttu máli, við lentum í Reykjavík um 2 leytið. Heiðin var viðbjóður, skyggni ýmist ein stika eða engin. Snjór og vesen, flutningabíll á hliðinni og sæmilegasta samloka í Hreðavatnsskála.

Sól...

2009-03-02T22:31:00.003Z

... hvítvín og heitur sjór - eða snjór, hvítvín og heitur pottur, já eða kannski bara toddý undir teppi að horfa á imbann. Kók, teppi og tölva er bara ekki að hitta í mark núna.

Ég er að kafna úr geðvonsku - já eiginlega bara fýlu...

Íbúðin sem mig langaði í er ekki lengur á sölu.
Fluginu mínu var aflýst í dag
Mér er skítkalt

Maríuhænan

2009-02-24T22:15:00.003Z

Litla barnið mitt á í svo krúttlegri baráttu við sjálfa sig og mig móður sína. Hún er ekki 7 ára heldur 7 ára að verða 8 ára og ef maður er nákvæmur eins og meyjan er gjarnan þá segir maður að hún sé 7 og hálfs. Hún er óttleg mömmustelpa og ofdekruð eftir því en að sama skapi vill hún ekkert hafa mömmu sína með í öllum aðstæðum.

---

Nýjasta dæmið er föstudagskvöld með Sunnefu... það hefur lengi verið á draumalistanum að eyða föstudagskvöldi með Sunnefu - ekki fá áfall, hún er ekki að fara á B5 :) Þær ætla saman í sjónvarpssal og fylgjast með beinni útsendingu, minnar nærveru er ekki óskað. María heldur nefnilega að það verði skemmtilegra án mín.

---

Annað dæmi er sokkabuxurnar við grímubúninginn. Við keyptum (saumum eftir einhver ár) Djöfulinn fyrir elsku litluna mína. Sokkabuxurnar þurftu að sjálfsögðu að vera rauðar í sama litatón og búningurinn. Ég fann þessar fínu sokkabuxur í Hagkaup... sem hittu ekki í mark heldur vildi meyjan fá rauðar nælon sokkabuxur.

---

Enn annað dæmi er Hello Kitty húfan hennar. Fyrir nokkrum dögum vorum við á hraðferð út um morguninn og fundum ekki húfuna hennar. Nema hvað, ráðagóða móðirn stökk niður í herbergi og fann Hello Kittý húfu með ásaumuðu nafni meyjunnar og skellti henni á höfuðið á barnið. Meyjan sagði ekkert heldur tók af sér húfuna og snéri henni öfugt og setti hettuna yfir. Amman kom svo og sótti barnið í skólann og fór með hana í ballett, þar átti hún í samræðum við vinkonu sína um blessaða húfuna.. amman fékk þá að heyra að húfan væri "ógeðslega barnaleg" og "hallærisleg".

---

Smá uppreisnarangi er fastur í afturendanum á henni þessa dagana - ég skrifa það á mömmuleysi undanfarinna vikna enda var hún alltaf með þennan anga fastan í sér eftir prófatíð í den. Krúttsprengjan mín er samt svo lítil þegar á reynir og vill alls ekki fara of langt frá múttunni sinni.. hlýtur að vera erfitt að finna sitt rétta hlutverk þegar maður vill verða sjálfstæður mömmuangi ;)

Heima að heiman

2009-02-22T23:26:00.002Z

Svoleiðis líður mér pínu þessa dagana, mér finnst ég vera í heimsókn - heima en samt að heiman. Ég á lítið krúttlegt herbergi með Maríuhænunni minni, mamma þvær fötin mín og ég elda matinn fyrir heimilið. Saman göngum við svo frá og höldum öllu þokkalegu. Ég þarf að klæða mig þegar ég búin í sturtu eða vefja utan mig handklæði til að ganga niður í herbergið - stundum langar mann bara að hlaupa um allsber - now the feeling?

----

Mig langar bara að flytja.. ég er samt í algjörri klemmu, það er gott að mörgu leyti að búa hér en samt langar mig að flytja.

Mamman Ásdís

2009-02-08T22:25:00.003Z

Fyrir 8 árum síðan og nokkrum dögum betur komst ég að því að ég væri ólétt. Fyrsta sem ég gerði var að hugsa, ofhugsa og senda Helgu sms með tíðindunum.. hún hafði sem sagt rétt fyrir sér. Á þessum 8 árum hefur mikið vatn runnið til sjávar.

María fæddist 7 mánuðum seinna, lítil bolla sem átti að fá allt það besta sem lífið gæti boðið upp á. Aðstæður voru oft erfiðar, og ég jú algjör krakki oft og tíðum en samt sem áður hefur þessi elska blómstrað og orðið að einu besta og klárasta barni sem um getur.

---

Frá því hún var lítil hefur hún alltaf verið mikill hugsuður og rólyndistýpa, hún er ekkert fyrir að flýta eða ana út í neina vitleysu. Það tekur allt langan tíma hjá Maríu, sama hvað það er - klæða sig, borða, læra eða bara greiða hárið. Þetta þarf allt að gerast í réttri röð og á réttum hraða.

---

Mamman stökk í foreldraviðtal í hádeginu á föstudag, vinnan hefur átt hug hennar allan undanfarnar vikur svo skottan var orðin ansi "mömmuveik". Það var mikill spenningur á heimilinu fyrir foreldraviðtalinu, María hafði orð á því á fimmtudagskvöldinu að kannski gæti hún fengið A í öllu en henni fannst það nú hæpið.

---

Í foreldraviðtalinu fengum við í fyrsta skipti vitnisburð, þar fengum við það skjalfest að við eigum lítinn snilling. Hún fékk að sjálfsögðu A í öllu. Hún les 170 atkvæði á mínútu en markmiðið er að þau nái 60-110 atkvæðum við lok 2.bekkjar, rúllar upp stærðfræðinni með annarri, skrifar mjög vel og sýnir mikinn þroska í skólastarfinu. Meðal annars lætur hún kennarann vita þegar hún hefur ekki vinnufrið og kemur með skemmtileg komment í umræður.

---

Eftir foreldraviðtalið fórum við mæðgurnar á bæjarrölt. Við byrjuðum í Þjóðmenningarhúsinu þar sem forvitnagenið í barninu fór á fullt og hver einasti krókur og kimi í húsinu var skoðaður - meira að segja salernin. Úr Þjóðmenningarhúsinu fórum við á Sólon þar sem sú stutta fékk sé köku og kakó - meðan hún slafraði kökunni í sig minnti hún helst á karlmann þar sem hún sagði ekki orð nema allt í einu poppaði út úr henni: "Hrikalega góð kaka mamma, smakkaðu" og rétti mér bita með skeiðinni.

---

Við enduðum svo bæjarröltið í Eymundsson þar sem keyptar voru bækur fyrir bókaorminn. Kvöldinu eyddum við svo fyrir framan imbann að háma í okkur nammi og spila Rommý og Asna. Nú er sunnudagur, á morgun er vinnudagur - það er langt síðan við höfum eytt heilli helgi saman, þrátt fyrir að búa saman. Mamman er alltaf of upptekin til að vera mamma, hún er komin með nóg af því.

Ofurbloggarinn..

2009-02-01T21:08:00.004Z

... er tekinn til starfa og bloggar alltof sjaldan eins og honum var von og vísa - Ásdís ofurbloggari. Þrátt fyrir að búa í sveit hefur lífið bara verið sérdeilis skemmtilegt undanfarið, ég vinn eins og mófó, kenni helming af kennsluskyldu fastráðins kennara, el upp yndislega dóttir og stunda heimsóknir í vesturbæinn grimmt við nokkra gleði heimamanna að ég tel.

---

Ég sakna vesturbæjarins ógurlega mikið og þægindana við að búa þar - það er ákveðinn lúxus að búa hér en samt sem áður er ákveðinn lúxus að búa einn. Það kemur að því að ég verð fullorðin aftur - gifting í sumar svo það eins gott að vera orðinn nokk fullorðinn þá - DJÓK! Ég er ekki ennþá búin að koma okkur nógu vel fyrir - einhvern veginn fer frítíminn minn í allt annað en að taka upp úr kössum, sortera og henda. Þegar María er hjá Nonna geri ég aðra hluti ;)

---

Ný ríkisstjórn tók við í dag eins og einhverjir hafa tekið eftir - pólitíska Ásdís sem reifst og rökræddi um pólitík svo dögum skipti hér í den nennir bara varla að pæla í þessu. Ef ég þarf fréttir þá fer ég í mat og hlusta á samræður fólks í kaffistofunni - jú og tek þátt stundum.

---

En hér hafið þið blogg, og kommentið svo!

Blessuð sértu sveitin mín...

2009-01-19T21:29:00.003Z

... ég bý í sveit, langt út sveit.. kílómetramælirinn á bílnum sýnir meiri keyrslu síðustu tvær vikur en í nóvember og desember til samans. Það fylgja því ákveðnir kostir að búa svona langt frá hjartanu - maður fær quality tíma í bílnum á hverjum morgni og alltaf á leiðinni heim. Ég gat til dæmis sagt Guðrúnu frá því hvernig lopapeysusöfnunin byrjaði - því jú ég var að hlusta á Bylgjuna á leiðinni í vinna einn morguninn - svo veit ég yfirleitt alltaf hver spurning dagsins er í Reykjavík Síðdegis.... og og og..

---

Ég ákvað að nýta mér það út í ystu æsar að búa í sveitinni á síðasta fimmtudag - og fékk þrefalt sjokk.. ég vildi bara fá Hressó, Smart og Melabúðina í lok kvöldsins! Ég þurfti aðeins að skjótast í búð og 10-11 í Arnarbakka var fyrir valinu þar sem hún var næst. Búðin minnti mig á sóðalegan súpermarkað á Spáni. Það var vond lykt þar inni, lítið af vörum í hillum og skuggalegt yfirbragð yfir öllu. Þrátt fyrir að öryggisvörður væri að afgreiða fann ég litla öryggistilfinningu í litla hjartanum mínu og dreif mig út.

---

Því næst ákvað ég að fara í ljós á minn gamla vinnustað - ég hef ekki farið þar í mörg ár. Ég held að ég ljúgi ekki að neinum þegar ég segist hafa kíkt í einn ljósatíma þar frá því ég hætti 2002 - á árunum 1997-2002 fór ég aftur á móti í marga tíma, þreif öll skúmaskot og bardúsaði við bekkina ef þess þurfti. Því mættu röntgenaugu á Sólbaðstofuna. Fyrst ætlaði ég að kaupa mér sjampó, það var ekki til. Þá ætlaði ég að kaupa mér krem á kroppinn, það var til ein tegund - sú sama og var seld 2002. Því næst fékk ég leyfi til að fara í bekkinn. Ég kveikti á honum og veitti því athygli að lítið hefur verið gert á þessum blessaða stað síðustu árin, veggirnir eru ennþá grænir og bekkirnir þeir sömu. Nema hvað, bekkurinn fór í gang með þvílíkum látum en samt ekki nógu kraftmiklum því það var dautt á 3 perum í efra - mig langaði að fara fram og biðja kerlu um skiptilykillinn og snúa perunum, athuga hvort ég gæti ekki fengið þær í gang eeeeennn mér fannst bekkur eitthvað svo ógirnilegur að ég var farin út eftir 4 mín - henti mér í sturtu og út í bíl þar sem ég setti upp andlit, greiddi hárið og kláraði að fínpússa apaköttinn. Heimsóknin á Sólbaðstofuna tók sennilega um 15 mínútur í allt.

---

Eftir ljósin fór ég og hitti Elínu mína á Draumakaffi - það var svo sem ekkert að því nema bara svona sveitó - krúttlega sveitó. Æi, bara svona ekki Hressó undir teppi með hitara.. tvöfaldan latte í glasi.. og nikótín

---

...eftir þessa sveitareisu brunaði ég í 101!

Fjarlægðin gerir fjöllin blá...

2009-01-08T21:34:00.002Z

... sagði eitthvað gáfumennið. Úr nýju stofunni "minni" hef ég gríðarlega gott útsýni yfir Reykjavíkina og upp á Skaga ef þannig liggur á. Á leiðinni í vinnuna í morgun virti ég fyrir mér útsýnið á meðan ég keyrði niður brekkuna og áttaði mig á því hvað Reykjavík er gríðarlega falleg borg, sérstaklega vestasti hlutinn..

---

Eggertsgatan var kvödd með trega á sunnudagkvöld. Búslóðin var flutt á tvo staði, hluti fór í geymslu og annar hluti fór með mér í "sveitina" eða úthverfið eins og mér finnst betra að kalla þennan stað ;) Þvílíkt og annað eins magn af dóti hefur sjaldan sést á heimili mægðna sem taldi aðeins 68 fm - flutningabílinn var einn, og burðarmenn/konur og hjálparkokkar voru 10 þegar mest lét. Ferðirnar á flutningabílnum voru tvær og klukkutímarnir við burðinn voru rúmlega þrír.

---

Síðustu daga hef ég verið að venjast því að vakna upp á nóttunni til að koma mér og Maríu af stað í skóla og vinnu. Eftir vinnu hefur tekið við þrotlaus vinna að koma fyrir dóti, Ólafsgeislinn er ekki enn farinn að minna á heimili enda er draslið þvílíkt sem fylgdi okkur Maríu. Sveitapjöllan ég er samt orðin ansi kræf í fatamálum - ég er búin að setja til hliðar heilan haug af fötum en samt bara búin að fara í gegnum ca helminginn af klæðum okkar mæðgna. Aðeins föt í "stöðugri" notkun fá skápapláss - hinn fara til vandalausra og vandamanna.

---

Það er merkilega erfitt að koma tveimur einstaklingum fyrir í einu herbergi ;)

Árið gert upp

2008-12-25T20:03:00.005Z

Hvað annað er við hæfi á síðustu dögum ársins en að íhuga það og gera það upp, svona rétt áður en það verður kvatt. Árið sem er að líða hefur að mörgu leyti verið mjög sérstakt, ég hef upplifað marga sigra og of oft látið í minni pokann. Samt finnst mér ég koma út sem sigurvegari. Stormasama árið 2008 verður kvatt með stæl á gamlárskvöld í góðum hópi.

---

Í upphafi árs fór ég í frábæra ferð til Tenerife - þá allra bestu frá upphafi. Ég, Maja, Beggi og börnin nutum þess að vera í afslöppun og leti í tæpar þrjár vikur. Aldrei áður hefur mig ekkert langað heim. Í febrúar og mars var ég á kafi í vinnu og fór í stórskemmtilega vinnuferð út á land. Við förum til Akureyrar, Egilsstaða og Ísafjarðar. Ég flaug á alla staðina, Akureyrarflugið var bara venjuleg - upp og svo niður. Egilsstaðaflugið var geðveikt - heiðskírt alla leið. Ísafjarðarflugið var viðbjóður - vélin hentist til og frá og við vorum grænar þegar við loksins lentum. Á Ísafirði afrekaði ég það að detta tvisvar á hausinn, einu sinni á rassgatið og í hitt skiptið fram fyrir mig. Mjög elegant. Ég þurfti bólgueyðandi í nokkrar vikur á eftir. Þessar ferðir áttu eftir að hafa jákvæðar afleiðingar á líf mitt og starf :)

---

Svo fór að vora og elsku Akureyrarfólkið mitt gifti sig, án þess að segja frá. Boðskortið kom í pósti og ég las það nokkrum sinnum til að fatta að þau hefðu raunverulega gift sig og komið í mat án þess að segja nokkuð. Ég átti afmæli eins og flest önnur vor, afmælið var táknrænt - ég þroskaðist talsvert við að verða 27 ára og fattaði á sama tíma að ákveðnir hlutir voru bara ekki að virka.. þó það hafi tekið aðeins lengri tíma að ná því í gegn.

---

Sumarið var gott og skemmtileg, endalaust sól í minningunni. Ég fékk launalaust leyfi til að vinna í ritgerðinni minni og þótti mér ganga nokkuð vel. Það var þrælskemmtilegt að geta setið yfir skólabókum eftir svona langa fjarveru. Ég ferðaðist smotterí innanlands, auðvitað til Akureyrar og í Brekkuskóg. Við Guðrún skipulögðum svo leyniferð til Krítar með Sunnefu og Viktoríu - sem þær fréttu af upp á flugvelli :) Á Krít var afslappelsi og lífsháski. Flugferðin heim var skondin og vandræðaleg. Þegar ég kom heim uppgötvaði ég nýjar lendur Facebook og er ennþá fárveik af þeim fræðum.

---

Haustið var skemmtilegt, flókið, auðvelt og erfitt allt í senn. Ég mætti til vinnu í september í nýja stöðu og fékk að blómstra í vinnunni. Mér tókst að flækja lífið allverulega eftir því sem leið á haustið. Ég vissi ekkert hvað ég vildi en hélt það samt, en veit núna að ég hafði rangt fyrir mér. Ég kynntist fullt af nýju fólki og fékk enn aðra stöðu í vinnunni sem ég er enn að læra á - mjög spennandi staða. Kreppan skall á af fullum þunga og ég ákvað að brjóta odd af oflæti mínu og flytja til mömmu um áramótin. Það er blendnar tilfinningar sem fylgja því að flytja en ég veit að þetta er tækifæri sem ég verð að nýta.

---

Nýja árið mun marka tímamót, ég ætla að snúa aftur til þess lífs sem ég vil hafa og ráða för. Ég ætla að búa í Ólafsgeislanum fram á vor og flytja svo aftur í vesturbæinn áður en næsti vetur skellur á. Ég ætla að klára ritgerðina mína áður en árið verður úti og mæta með date á árshátíðina.

---

Næsta ár verður það besta í sögunni!

SMS..

2008-12-21T14:29:00.002Z

Stundum tek ég mig til og hreinsa til í símanum mínum og hendi út sms skilaboðum - sá sem kæmist í símann minn í dag kæmist í feitt. Ég hef ekki tekið til í inboxinu síðan fyrir ári síðan. Elstu smsin er frá 22.desember í fyrra. Sms skilaboð eru ótrúleg heimild um líf einstaklinga, sá sem myndi skoða minn síma myndi komast að öllu um mig - allt frá peningamálum til ástarmála.

---

Sumir senda alltaf bara sms, aðrir senda aldrei sms. Samt sem áður fær yfirleitt meira að flakka í smsnum hjá fólki heldur en í venjulegu samtali. Það er svo gaman að lesa í gegnum þetta og sjá heildarmyndina úr allri súpunni. Sumt vekur furðu, stundum er heildarmyndin svo flókin að maður skilur hana ekki og stundum hlær maður bara.

---

Spurning um að fara að henda út?

Stjarnan mín..

2008-12-16T00:00:00.005Z

Prinsessan mín keppti í fótbolta á laugardaginn, það var gaman að fylgjast með henni þjóta upp völlinn og tækla stelpurnar í hinu liðinu. Það skemmdi ekki fyrir að stjarnan mín skoraði þrusumark og fékk mynd af sér í Mogganum. Stolta mamman sýndi öllum í vinnunni litlu stjörnuna sína :)

---

En hún er að þroskast svo mikið. Í gærkvöldi var hún á msn hjá mér, ég dormaði í sófanum og japlaði á nammi á meðan. Þegar svefntími var kominn á þá stuttu kíkti ég í tölvuna og sá að hún hafði sagt viðmælandanum sínum á msn að ég væri að borða nammi og spurði viðkomandi hvort hann ætlaði ekki að fara að kíkja í heimsókn ;) Spurning um að fara að búa til hennar eigin msn...

---

Svo kom háttatími fyrr í kvöld, við lágum saman upp í rúmi og hún las fyrir mig. Ég var svo þreytt að ég ákvað að dorma aðeins með henni í smá stund. Í miðju dormi spyr hún mig hvað hún fái í skóinn í nótt! Ég sagði að ég vissi það ekkert, hún benti mér réttilega á að ég vissi það bara víst og ég sagði að ég væri ekki jólasveinn og vissi þar af leiðandi ekkert um það. Umræðan dó og María sofnaði.

---

Hvað gefur maður svo svona stjörnum í jólagjöf? Hún vill ekki fósturpabba nema hann sé dökkhærður og eigi ekki lítinn strák (fyrirvarinn líka frekar stuttur - rétt vika til jóla), hún vill skíði en ég kann ekki á skíði, hún vill ekki föt en hana vantar föt, hún vill BabyBorn bíl...

10 dagar til jóla..

2008-12-14T15:11:00.003Z

.. og hér er allt eftir. Ein jólasería komin inn á elskulega barninu mínu. Geymslan svo gott sem komin inn í stofu og allt út um allt. Í dag ætlaði ég að vera búin að fylla leigugeymsluna og gera allt voðalega jóló hjá mér hérna heima. Ætlaði er lykilorðið.

---

Ég veit ekkert hvað ég á að kaupa í jólagjafir, ég veit ekkert hvað fólki vill fá í kringum mig. Ég hef aldrei verið svona lost í þessum efnum. Vinkonurnar eru margar meira lost en ég hvað á að gefa karlinum í jólagjöf.. ég veit alveg hvað ég ætla að kaupa fyrir minn - þegar ég eignast hann :) Ég verð búin að hafa mörg jól til að íhuga þessa klassísku "gjöf handa karlinum". Þegar ég fer að sofa í kvöld skal ég vera búin að gera eitthvað meira jóló og notó hérna heima á Eggertsgötunni.

---

Litli snillingurinn minn var að keppa í fótbolta í gær. Hún er helvíti góð þessi elska, hún þrumaði einum bolta í markið og sýndi hörkuleik. Stúfur var svo ánægður með hana að hún fékk úr í skóinn, hana er búið að dreyma um úr lengi.

Aníveis, tilgangslaust blogg sem minnir á að lítill tími er til jóla. Sálin er á Players næstu helgi????

Heimatilbúið..

2008-12-11T23:31:00.002Z

Á morgun er glöggið mikla.. fyrir ári fór ég heim eftir 2 tíma - ekki drukkin heldur dauðþreytt. Ég hafði vakað í rúman sólarhring við verkefnaskil og lagði mig yfir daginn. Meikaði ekki glöggið og fór heim. Fyrir tveimur árum var ég í prófum og varð fyrir aðkasti með kaffið mitt. Núna er verð ég hvorki of þreytt né að læra heldur @the glögg

---

DoubleChicks.. Frú Stella and me erum planleggjarar kvöldins. Í einhverju annarlegu ástandi ákváðum við að það væri sennilega best að sjá um þetta frá A-Ö. Verkefnið virist óyfirstíganlegt í gær sökum anna en þetta er allt að smella. Húsmóðurgenin fóru á overdrive og hér bullar í pottum, vel sneiddur lax (reyktur og grafinn) liggur pent á fati í ískápnum og tvær tegundir af köldum sósum þekja hillur ísskápins. Kjötið verður skorið á morgun, þegar það hefur fengið að kólna vel.

---

Fáránlegast af öllu er að mér finnst þetta bara nokk skemmtilegt, í miðjum laxaskurði velti ég því fyrir mér af hverju ég væri bara ekki heimavinnandi? Augljósasta svarið er náttúrulega að ég hef enga fyrirvinnu .. og sjálfsagt myndi geðheilsan fara fyrir lítið ef ég færi að vinna heima við eitthvað annað en "skrifstofudjobb". Félagi minn, unglingur í götunni, sagði reyndar við mig um daginn að hann sæi mig ekki fyrir sér heimavinnandi... og við tóku miklar útskýringar á því að ég væri sennilega ekki léleg húsmóðir og jari jari jari heldur sæi hann ekki mig una mér í því starfi. Sannast sagna þá verð ég seint talin góð á því sviði.

Tótallí pointless

2008-12-09T00:48:00.006Z

Helgin var frábær.. ég get ekki sofnað og hangi á netinu eins og maður á ekki að gera... en stal þessu af öðru bloggi:

---

Á fæðingarvottorðinu mínu stendur Ásdís Ýr Arnardóttir, ég er kölluð Ásdís eða Ásdís Ýr. Ég fæddist 27.apríl 1981 á stofu 6 á þriðju hæð Hérðashælis Austur Húnvetninga á Blönduósi. Ljósmóðirnir sem tók á móti mér hét Agatha og var nágranni minn, vinkona mömmu og mamma vinkvenna minna. Ég bý í Reykjavík í dag en hef búið á Blönduósi, í Mosfellsbæ og Keflavík. Ég með dökkt hár eins og Anna Sigga gerir það hverju sinni, alltaf mjög fínt þegar hún er nýbúin að sansa það. Ég er ekki með nein asnaleg göt á líkamanum fyrir utan hálfgróið tungugat sem ég fékk mér þegar ég var 16 ára, stuttu áður en ég lét flúra á mér mjóbakið. Engar freknur hafa látið sjá sig en fæðingarblettir eru of margir. Ég er rétthent og nota skó númer 40 á góðum degi.

---

Ég er matargat og elska að borða, upphaldið mitt er reykt svínakjöt, sveitamatur og nautasteik. Ef ég sukka þá fæ ég mér yfirleitt KFC eða Makka. Ég get drukkið óeðlilega mikið magn af kóki og kaffi en samt alltaf súper róleg :) Vatn og ávaxtasafi kemst sjaldan inn fyrir mínar varir.

---

Ég hef aldrei komið til Afríku en laug því samt í grunnskóla. Ég hef einu sinni lent í bílsslysi og fékk far í diskóbíl. Samt féll ég aldrei á ökurprófinu. Mér finnst föstudagar bestu dagar vikunnar og verð eirðarlaus á sunnudagskvöldum. Ég horfði mjög sjaldan á íþróttir í sjónvarpi nema landsleiki í handbolta.

---

Pæjan í mér vill demanta en íhaldasama stelpan vill perlur. Mér finnst unaðslegt að fara í bað en sturtan þarf yfirleitt að nægja þar sem ég á ekki baðkar. Ég syng í sturtunni ef enginn er heima og ég er að fara út á lífið. Ég hef sungið í ljósabekk fyrir aðra gesti sólbaðstofunnar. Ég er rammfölsk. Tannburstinn minn er appelsínugulur og hvítur, suma daga æli ég ef ég nota annað tannkrem en Sensodyne.

---

Ég er næturhrafn en þoli ekki að sofa frá mér daginn. Ég elska sumarið og hávetur ef það er allt á kafi í snjó. Ég vil hafa öll ljós kveikt, ef ég á ljósaperur í það. Sólarlagið er mitt.

.. næstu skref!

2008-12-04T21:54:00.002Z

Lífið undanfarna mánuði hefur verið sannkölluð rússíbanareið, suma daga hef ég verið með fiðrildi í maganum og aðra þungan stein. Stundum veit ég ekki í hvorn fótinn ég á að stíga, einhvern veginn er það alltaf þannig hjá mér að ef mér gengur vel á einu sviði gengur mér illa á öðru. Spurning um að finna jafnvægi? Stundum þrífst ég best undir álagi, áður fyrr gerði hver meistaraverkin á eftir öðru á no-time en núna verð ég bara þreytt, er ég að verða svona gömul? Nóbbb ung sem lamb alla tíð..

---

Rússabanareiðin er erfið og leiðinleg, ég er komin með nóg af henni. Helgin verður því nýtt til hins ítrasta að vinna upp tapaðan tíma með góðri vinkonu og yndislegum börnum. Helgarplanið mitt er einfalt, fara í bústað með Völlu og plana næstu mánuði og íhuga þessa liðnu.

---

.. tölvan verður heima svo ég skoða ekki facebook, msn eða mailið mitt heila helgi - ég fæ ábyggilega taugaáfall :)

Að láta sig dreyma

2008-11-30T21:17:00.003Z

Það er aldeilis farið að styttast í flutninga hér á bænum. Eftir nákvæmlega mánuð verðum við að undirbúa síðustu metrana í flutningum. Flutningar hafa lengi verið í hausnum á mér, stundum hefur mig virkilega langað til að flytja.. flytja eitthvað langt eins og til Akureyrar og hafa Völluna mína alltaf nálægt eða flytja í litla íbúð þar sem það verður bara pláss fyrir okkur Maríu og kannski einn kött.. engan annan eða bara eitthvað.. og bara allt þar á milli.

Stundum hefur mig líka bara langað til að flytja til að geta loksins eftir margra ára bið búið til mitt heimili, málað veggina og skipt um gólfefni eða bara dúllast eitthvað til að gera íbúðina að "minni". Ég er margoft búin að innrétta draumaíbúðina mína í huganum. Hún verður hlaðin af listmunum, með ljósum húsgögnum og hvítum veggjum.. og kannski einhverju veggfóðri.

---

Draumarnir breytast eftir stund og stað. Stundum dreymir mig spinster líf með Maríu, í þykkri peysu að vinna hjá stjórnsýslunni í Háskólanum og grufla í bókum á kvöldin í lítilli og þröngri íbúð í vesturbænum. Hina dagana dreymir mig um að eiga fullt hús af börnum, flottan kall, vinna stuttan vinnudag og kúra yfir imbanum á kvöldin í rúmgóðri íbúð í vesturbænum.

---

Draumarnir fara núna á hold í smá tíma á meðan við mæðgur komum okkur fyrir í nokkra mánuði í Grafarholtinu. Búslóðin verður þó í vesturbænum í geymslu - borgar sig ekki að fara með hana of langt :)

Sjóleiðis

2008-11-28T10:52:00.004Z

Hvað er að verða um heiminn okkar? Litla sæta krúttlega heiminn okkar? Hryðjuverk á Indlandi og rómantísku hulunni af Taj Mahal ýtt út af borðinu... Airbus hrapar í Miðjarðarhafið og öll áhöfnin ferst, sem betur fer var hún án farþega... Stríðsástand í Bangkok.. og endalaust svartnætti í peningamálum á Íslandi. --- Kannski maður ætti bara að sækja um ríkisborgararétt í USA, Obama lofar nýjum og betri heimi og ætlar ærlega að hreinsa til og svo eru þeir oft svo narrow-minded að þeir vita sjálfsagt ekki að það hafa verið framin hryðjuverk á Taj Mahal, Airbusinn hafi hrapað eða að flugvöllum í Taí sé lokað. Ég held að það sé ákveðinn lúxus að vera Bandaríkjamaður í dag.. ef við gefum okkur það að þeir séu allir eins og fólkið í Leno (sem við ætlum að gera). --- Samt er bara gaman að vera jéggg... ég hef vinnu og meira að segja nýja vinnu og mun hafa vinnu. Ég á frábæran vinnuveitanda sem líkast til fer seint eða aldrei á hausinn - tæknilega séð er það víst ekki hægt. Ég hitti mikið af skemmtilegu fólki þessa dagana, fullt skemmtó á plönunum.. jólahlaðborð í kvöld, bústaður eftir viku, jólaglögg vikuna þar á eftir... fríhelgi og svo jólajólajóla! Einhvers staðar á þessu tímabili ætlar hún Elín mín svo að eignast litlu knúsuna mína. --- Nóvember er að verða búin með öllum sínum afmælum. Þið öll, til hamingju með daginn og börnin ykkar. Amma fær þó stærstu kveðjuna en hún hefði orðið 77 í gær :* --- Enveís.. ég er komin í glöggstuð?

Leitin að bílnum

2008-11-18T20:07:00.002Z

Ég þykist nokkuð viss um það að allir hafa einhvern tímann lent í því að týna bílnum. Mér hefur tekist það nokkrum sinnum, sem betur fer hafa afleiðingarnar sjaldanst verið alvarlegri en rauðar kinnar og sært egó. Mér finnst frekar fyndið að hugsa til þess að flest "leitin að bílnum" atvikin hafa átt sér stað á Háskólasvæðinu.

---

Elsta tilvikið sem ég man eftir var þegar ég mætti í Odda á gamla góða Passatinum og skellti honum í stæði, hljóp inn í Odda og sat þar allan daginn. Rétt fyrir fimm ákveð ég að fara af stað og vitið menn, bílinn er ekki þar sem ég taldi mig hafa lagt honum. Var honum stolið? var það fyrsta sem flaug í gegnum hugann. Ég skimaði í kringum mig og efaðistu um eigið minni.. þar til ég sá bílinn. Hann stóð hálfur upp á gangstétt, á milli umferðaskiltis og annarar bifreiðar. Einhver glöggur háskólamaður hafði sett steypuklumb við annað afturdekkið. Ég hafði þá lagt bílnum í stæði, skellt hurðinni og læst bílnum samviskusamlega. Ég gleymdi þó einu mikilvægu, eða tvennu, bíllinn var hvorki í gír né með handbremsuna á.

---

Svo liðu nokkuð mörg ár og undanfarið hef ég mjög oft leikið leikinn "Leitin að bílnum". Fyrir nokkru var ég að vinna frameftir. Einn Subaru Legacy ljósblár að lit var fyrir utan Gimli þegar ég gekk út úr vinnunni. Ég smellti á forláta takkann sem á að sjá um að aflæsa bílnum en allt kom fyrir ekki, engin ljós blikkuðu og lásinn sat sem fastast. Ég reyndi þá að opna með lykilinum, en það var sama sagan. Lykillinn haggaðist ekki, sama hvoru megin ég reyndi. Á meðan mér rigndi niður var mér litið inn í bílinn, að svo búnu fór ég og athugaði númerplötuna. Þetta var ekki minn bíll.

---

"Leitin að bílnum" var tekin aftur í dag. Ég hreinlega mundi ekki hvar ég lagði bílnum. Ég hafði farið út í hádeginu og algjörlega ruglað skipulaginu/óskipulaginu í höfðinu á mér og gekk fram og tilbaka á stóra malarstæðinu. Allt í einu rak ég augun í bílinn, hann var fremst á stæðinu svo ég gekk samviskusamlega framhjá honum þegar ég gekk inn á bílastæðið. Eftir langan vinnudag er eitt það síðasta sem mig langar að gera er að fara í "Leitin að bílnum".. samt gerist það alltof oft

í þá gömlu góður.. áður ég fæddist :)

2008-11-13T00:04:00.006Z

Fyrir nokkrum árum vandi ég mig á þann ósið að lesa fyrir svefninn - þegar mikið er að gera finnst mér nauðsynlegt að lesa eitthvað algjörlega óskylt því sem ég geri á daglegum basis, bara svona rétt til að hugsa um eitthvað allt annað. Við rúmið mitt þessa dagana eru tvær bækur, önnur eftir Sigurð Líndal um lög og lögfræði og hin er Öldin okkar 1971-1975. Sú síðarnefnda hefur verið í uppáhaldi síðustu kvöld.

---

Stundum skil ég ekki af hverju ég fór ekki í sagnfræði, jú ég skil það svo sem alveg.. ég hef lítinn áhuga á því sem gerðist fyrir aldamótin 1900 :) Öldin okkar er því tilvalin leið til að dýpka sagnfræðiþekkinguna... þar er margt spennandi að finna. Til dæmis:

---

24.október 1975 var í fyrsta sinn sent út sjónvarpsefni í lit, þátturinn var um ballett. Allt íslenskt efni var þó enn sent út svart-hvítt.
1971 varð hugtakið grunnskóli til þegar frumvarp að lögum um grunnskóla var lagt fyrir, lögin voru svo samþykkt 1974 - mín uppáhaldslög :)
18.mars 1971 voru popphljómleikamenn látnir berhátta við komuna til landsins frá Færeyjum vegna gruns um fíkniefnasmygl
1. maí 1971 hentu iðnnemar líkkistu iðnfræðslukerfisins út í Tjörnina í mótmælaskyni við lág nemalaun - hefur engum dottið í hug að endurtaka leikinn?
2.apríl 1971 gáfu SÍNE (Samband námsmanna erlendis) út "Lítið rautt kver fyrir skólanemendur" þar sem nemendum var kennt að standa upp í hárinu á kennurum og lögreglustjórinn í Rvk vakti athygli saksóknara á kverinu þar sem fjallað var um kynlíf á heldur opinskáan hátt. Kverið minnti á rauða kverið hans Mao formanns :)
7.maí 1971 var Hemma Gunn og Þorbergi Atlasyni neitað að spila með landsliðinu í fótbolta nema þeir myndu láta klippa síða hárið
2.júní 1971 var Saltvíkurhátíðin haldin. Talið var að 10.000 manns hefðu sótt hátíðina og engin alvarleg slys urðu á fólki.
3.janúar 1974 hefur fræðimaður áhyggjur af málfari unga fólksins en það var farið að nota orð eins og pía, tjása, pæja, skvísa, bomba, kroppur, gaur, peyi, gaukur og töffari. Jafnframt hafði hann orð á því að unglingar fíli hitt og þetta og pæli í öðru.
7.október hefur áfangakerfi framhaldsskólanna verið tekið í notkun og þá þurfti 132 einingar til að ljúka stúdentsprófi.

--- Að sjálfsögðu gerðist margt annað áhugavert, til dæmis fær Z margar síður þar sem hún virtist ætla að verða eilíft þrætuepli á Alþingi, við áttum auk þess í hatrömmu stríði við Breta um þorskveiðar, Geirfinnur hvarf og Bobby Fischer passaði fyrir Sæma.

Obama Obama Obama

2008-11-05T11:41:00.002Z

Ég gat ómögulega sofnað í gærkvöldi og fór því að horfa á kosningasjónvarpið.. ég var alveg viss um að Obama myndi taka þetta með annarri þangað til ég hætti að hugsa og fór að hlusta á pælingarnar í sjónvarpinu. Munurinn var stundum svo lítill og ég fékk flashback frá síðustu Alþingiskosningum, þegar ég fór að sofa þegar meirihlutinn var fallinn en vaknaði svo og bláu mennirnir voru enn sterkir...

---

Ég varð virkilega stressuð um að kannski myndi Obama ekki ná þessu, ég kom mér fyrir í sófanum með sæng og kodda og ætlaði aldeilis að fylgjst með þessu. Skottan mín var búin að vera að vakna svo ég átti alveg eins von á andvökunótt, fínt að eyða henni yfir kosningasjónvarpinu... nema hvað. Ég steinsofnaði og vaknaði þegar litla skinnið mitt skreið undir sængina hjá mér í sófanum og klukkan orðin átta að morgni.

---

Ég stökk á fætur (ekki bókstaflega) og hækkaði í fréttunum... jú jú Obama þau í þurrt og ósmurt. Ég er svo mikill sökker að mig langaði bara mest að hafa upp á kauða og óska honum til hamingju, jeminn ég var svo ánægð. En það bíða hans mörg verkefni.. hreinsa upp skítinn eftir elsku Bush.

---

En án gríns þá er þetta gríðarlega gott tækifæri fyrir BNA... hann fékk xtra prik hjá mér í ræðunni sinni þegar hann sagði disabled and non-disabled people.. þið sem pælið í því skiljið hvað ég er að fara - spurning um ofhugsun :)

Líf mitt er verkefni..

2008-11-03T23:50:00.004Z

... var mér sagt áðan :) Flest kvöld fara í það að fara yfir verkefni (með Facebook pásum), þeim fækkar ekki heldur fjölgar ef eitthvað er. Önnin er að verða búin og þá verkefnin líka.. þeas þessi eiginlegu verkefni.

---

Lífið heldur áfram, það er eilífðarverkefni - nokkuð einfalt verkefni. Ég var heima með Maríu í dag og milli þess sem ég fór yfir verkefni fór ég á fésbókina og skrifaði blogg.. ég kom mér samt aldrei í það að birta þau - sum voru bara fyrir mig.. það er svo gaman að vera ég í dag - hin voru bara leiðinleg.

---

Á milli þess sem ég fór yfir verkefni, stúterði fésbókina og skrifaði blogg las ég gömul blogg frá mér. Það er gaman að lesa þau, fyndið að sjá hvað maður hefur þroskaðst frá því í apríl 2005.. staðan mín var líka allt önnur þá - ég stóð líka öðruvísi.. ég var meira svona á tánni :) Ég þakka samt Guði fyrir að bloggið var ekki til þegar ég var yngri...

---

Eníveis, pointless blogg en blogg samt sem áður...

---

Ps. átti ég kannski frekar að blogga um að Norðmenn ætla enn eina ferðina að sjatla málin við Breta? Nauuuuu

Framundan..

2008-10-29T22:49:00.002Z

...eru ef til vill skemmtilegir tímar, ég vil trúa því. Það eru mörg tækifæri framundan og galdurinn ku að vera að nýta þau til hins ýtrasta. Það hefur sjaldan verið eins mikið um að vera í félagslífinu hjá mér og nú, kannski er það vegna sífelldra áminninga um að þjóðin eigi að standa saman eða bara loksins sér fólk tilefni til að gera sér glaðan dag. Ég er búin að hitta mikið af skemmtilegu fólki, nýju og gömlu og ég hef sjaldan hlegið eins mikið. Á planinu er fullt af skemmtilegum hlutum, stelpudjamm, brjóstsykursnámskeið, sumarbústaður, afmæli og bara fullt...

---

Á sama tíma er ég mikið að hugsa, mikið að spá.. samt með það að markmiði að ofhugsa ekki hlutina :) Við María eigum eftir að búa hér á Eggertsgötunni í 2 mánuði í viðbót, við fluttum inn í tvistinn í mars 2003 að mig minnir.. Það er mikið frelsi fólgið í því að búa hér, María á vini á öllum hæðum og ég á Önnu mína rétt hinu megin við hornið. Þetta er yndislegt hús þrátt fyrir ljót gólfefni og lélega innréttingu :) Ég stóð mig að því í kvöld að horfa á kvöldhimininn og spá í því hvort hann væri eins fallegur í Grafarholtinu, eflaust - bara annað sjónarhorn.

---

Ég á eftir að sakna þess að búa í vesturbænum, hér er allt mitt en ég ætla að koma hingað aftur síðar. Mér finnst broslegt að hugsa til þess að þegar ég flutti í vesturbæinn átti það að vera tímabundið.. bara rétt á meðan ég kláraði Háskólann.. núna langar mig ekkert að fara héðan.

Sunday..

2008-10-26T20:30:00.002Z

Eru sunnudagar ekki ekta bloggdagar? Þeir eiga að vera letidagar þar sem allt annað fær að sitja á hakanum. En ég er búin að dekra svo mikið við mig um helgina að það var ekkert val um neitt nema skella sér í úlpuna og út á skrifstofu.. þar sem ég sit núna og rembist við að læra. Ég blóta því núna að hafa ekki sent viðgerðarbeiðni til RHÍ þar sem hátalarinn virkar ekki á tölvunni minni.. það væri notalegast að geta haft smá tónlist hérna fyrst maður er aleinn á stóru skrifstofunni.

---

Það er stuttur vinnudagur á morgun því María er í vetrarfríi, við ætlum að dúllast eitthvað eftir hádegi á morgun saman bara tvær. Hún er orðin svo stór þessi elska, við vorum í foreldraviðtali í síðustu viku - það gekk svo vel og ég er svo stolt af henni. Hún er langt yfir meðallagi í lestri en hún les 127 atkvæði á mínútu en meðaltalið er 100 í bekknum. Hún skoraði 9,9 á stærðfræðiprófi - hefði átt að fá 10,0 en það er önnur ella - börnin eiga víst að uppgötva stærðfræðina í dag en ekki kunna hana. Einstaklega vel heppnað eintak þetta barn þó ég segi sjálf frá, hún er ánægð í skólanum og líður vel þar. Hún á eftir að ná langt þessi elska, ég efa það ekki.

---

En helgin er búin.. MA ritgerðarfrestun að síast inn enn eina ferðina og ég hlakka til jólanna

Að flækja málin

2008-10-21T22:42:00.003Z

Stundum held ég að ég sé snillingur að flækja málin og ofhugsa hlutina, já eða bara hugsa þá ekki neitt. Alltaf of eða van á þeim bænum... gullna jafnvægið virðist ekki vera til hjá mér stundum. Þegar manni tekst að búa til svona flækjur þá er gott að eiga góða vini til að dempa öllu á, öllu sem er svo lítið þegar vinurinn er búinn að kryfja það til mergjar. Eða jafnvel áttar maður sig á því að vandamálið er svo ekkert vandamál heldur ofhugsun á einföldum hlutum, kannski er einfaldleikinn til?

---

Stór hluti af MA náminu mínu felst í því að ígrunda og pæla í hlutum niður í kjölinn og jafnvel undir hann... sífelld gagnrýni á það sem sett er fram, kannski þess vegna sem ég hugsa of mikið :) Síðustu daga hafa ljósmyndir átt hug minn allan af þeirri einföldu ástæðu að ég þurfti að finna mynd á póster fyrir Þjóðarspegilinn. Ég fann mynd fyrir pósterinn hjá ljósmyndasnillingnum henni Helgu sem ég fékk að nota. Ljósmyndir segja svo mikið, meira en þúsund orð og því er svo mikilvægt að vanda valið. Ég fékk hjá henni mynd sem endurspeglar að miklu leyti væntanlegar niðurstöður rannsóknarinnar minnar. Ég er ótrúlega ánægð með hana. Þið getið skoðað pælingar um hana hérna.

---

Í dag skaut svo lúðinn upp kollinum á kaffistofunni þegar verið var að ræða auglýsinguna fyrir Þjóðarspegilinn. Myndin er blörruð og mér fannst það endurspegla samfélagið eins og það er í dag, það hélt ég að væri pælingin á bak við hana. Samfélagið er eitt kaos þessa dagana og ráðstefnan heitir Þjóðarspegilinn.. spegill þjóðarinnar. Sá eini sem heyrði þessar pælingar mínar hló, sagði að ég hugsaði of mikið :)

---

Eftir kaffistofusessionið sendi ég svo út fullt af tölvupóstum til fólks sem ég þekki mismikið vegna ráðstefnunnar. Þegar ég ýtti á send fékk ég bakþanka... átti ég kannski ekki að senda þessum eða hinum... auglýsingin fór til þeirra sem ég veit að tengjast ekki HÍ og eru úti á akrinum að vinna við sitt fag. Ég búin að hugsa um þetta í allan dag...

Mánudagur

2008-10-20T19:08:00.002Z

Mánudagur til mæðu.. mikið langaði mig að gera ekki neitt í dag en það var víst ekki í boði. Ég var búin að vera óttalega öfugsnúin í dag, einfaldleikinn virkar eitthvað svo flókinn. Við vorum seinar á ferð eins og svo oft áður en settum persónulegt met.. það tók okkur 15 mínútur að vakna, græja nesti, íþróttaföt, ballettföt, bursta, borða og greiða. Andlitið mitt fór með í veskinu og hefur reyndar ekki enn verið sett upp..

---

Kuldinn er ekki mitt thing.. nema þá til að hanga í sumarbústað með hvítvín í heitum potti - með móðu á gleraugunum :) Mig langaði að reyna að troða mér í snjóbuxurnar hennar Maríu en ég lét mér nægja að pakka mér inn í dúnúlpuna mína, ég renndi upp í háls og setti hettuna á höfuðið, þar sló ég tvær flugur í einu höggi! Mér var hlýtt og enginn sá að hágreiðslan var í verri kantinum.

---

Ég er samt farin að hlakka til jólanna... ég hlakka til að hafa það notalegt með fullt af mat og góðu fólki. Aldrei þessu vant er ekkert á döfinni hjá mér í desember nema skila af mér einu námskeiði og jú ein MA ritgerð. Ég ætla að gera svo margt fyrir jólin, mig langar að baka og búa til konfekt ... og svo væri draumur ef mér tekst að draga Völluna í sumarbústað á aðventunni eins og við gerðum um árið. Stefnan er svo tekin á að borða 2ja ára skammt af jólasteikinni.. og enga aspassúpu þetta árið. Kannski er það kuldinn sem fær mann að hlakka til eða bara sú staðreynd að stutt er til jóla.. sem þýðir að stutt er í ritgerðarskil og flutninga... Það verður öðruvísi að búa í 113...

Svífur yfir bloggandinn...

2008-10-15T19:32:00.003Z

Undanfarið hefur mig langað að blogga .. en samt hef ég ekki fundið andann sem knýr mig áfram á þessu sviði. Já um hvað á ég að blogga? Á ég að blogga um síðustu helgi, hún var ein sú skemmtilegasta í langan tíma - ég hitti skemmtilegt fólk, hló mikið, svaf lítið og *hóst*.. drakk mikið hvítvín :) Eða á ég að blogga um efnahagsmálin og hvernig skynsamt væri fyrir pólitíkusana að fá lán hjá IMF til að geta skellt skuldinni á þá þegar þarf að hækka skatta og ef eitthvað meira fer úrskeiðis? Eða jafnvel blogga um það jákvæða sem felst í öllu þessu efnahagsbrölti? Svo gæti ég náttla bloggað um nýju vúdúdúkkuna mína???

---

Ég held að það standi upp úr þessu öllu hvað það stendur margt frábært fólk í kringum mig, ég á góða fjölskyldu, skemmtilega vini og vinn með frábæru fólki. Frá því þetta allt fór í gang hef ég er mjög treg við að fara í búðir - ólíkt þeim sem hafa hamstrað fyrir kjarnorkustyrjöldina. Hugurinn tók U-beygju þegar allt fór að hrynja, ég hef ekki notað kort síðan Glitnir fór - samt er ég viðskiptavinur Landsbankans :) Hagsýna húsmóðirin hefur fengið byr undir báða vængi og ég get svarið það að mjög langt er síðan ég hef verið eins hagsýn í innkaupum og heimilishaldi - og mér líður bara nokkuð vel með. Spara er mitt mottó. Búðarferðirnar hafa verið það fáar að ég man ekki hvenær ég þurfti að draga Maríu með mér eftir skóla í hundleiðinlega verslunarferð sem þýðir að við höfum betri tíma saman.

---

Vúdúdúkkan hefur ekki enn verið notuð.. að neinu viti... en ef þú finnur fyrir einhverjum óútskýrðum verkjum.. þá er ég ekki vinur þinn muhahhahaha :)

Rídd?

2008-10-14T00:15:00.005Z

Lesefni kvöldsins var erfðir, gen og litningar og því sérdeilis skemmtilegt að fá þennan gullmola í tölvupósti..

Þessi gullvæga setning heyrðist við kvöldmatarborð frá einni á leikskólaaldri nýverið.

---

Dóttirin: "Var ég búin til í glasi eða ættleidd eða rídd?"

---

Sem er tilefni þessarar vísu

Úr hvaða efni er ég smídd,

af íslensku holdi eða þýdd?

Ég vita það vil

því víst er ég til.

Er ég ættleidd, úr glasi eða rídd?

---

Við spurningu barnsins svarar pabbinn svona:

---

Úr ágætis efn' ertu snídd

og kostunum bestu ertu prýdd.

En eitt máttu vita ég vann mér til hita,

því á gamaldags hátt varstu rídd

Stjörnuspá dagsins..

2008-10-13T10:17:00.001Z

Naut: Árásargirnin eykst hjá þér sem er frábært ef þú ætlar að yfirtaka fyrirtæki eða vinna fótboltaleik. Annars skaltu minnka kaffeínið og hraðann. --- Annars er óttalegur mánudagur í mér og mig langar ekkert að sleppa kaffibollanum...

Iceland vs America

2008-10-09T19:04:00.003Z

The Americans have Bush, Stevie Wonder and Johnny Cash. The Icelanders have Haarde, no wonder and no cash!

Tilgangslaust en pínu skemmtilegt

2008-10-06T20:18:00.004Z

Kidda (sem nota bene er starfsmaður KB banka) klukkaði mig um daginn, dagurinn í dag er tilvalinn til að velta hlutunum aðeins fyrir sér... Fjögur störf sem ég hef unnið við um ævina:

Háskóli Íslands
Götusmiðjan
Sólbaðstofa Mosfellsbæjar
Snæland video

Fjórir staðir sem ég hef búið á um ævina:

Blönduós
Mosfellsbær
Keflavík
Reykjavík

Fjórar bíómyndir sem ég held upp á:

Ég
man
aldrei
eftir myndum

Fjórir sjónvarpsþættir í uppáhaldi:

Law and Order
Law and Order: SVU
Biggest Looser (leyndó samt)
CSI

Fjórar bækur sem ég hef lesið oftar en einu sinni:

Lýðmenntun - hreinlega elska þá bók (brilliant bók fyrir fólk í menntapælingum)
Ísland í aldanna rás (bara svona ef maður hefur ekkert að gera)
Útkallsbækurnar (góðar fyrir svefninn)
Mannkynbætur (sérlega áhugaverð bók um mannkynbótastefnur)

Matur sem er í uppáhald:

Hamborgarhryggur
Kalkúnn
Nautasteik
Indverskur

Fjórar síður sem ég heimsæki daglega (fyrir utan bloggsíður):

Fjórir staðir sem ég hef heimsótt í fríum:

Tenerife (sól og sæla með famelíunni)
Chile (búðir, áfengi og spænska)
Krít (sól, hiti, strönd og lífsháski)
Noregur (Helgan, búðir og áfengi)

Fjórir staðir sem ég myndi vilja vera á núna:

Á Akureyri hjá Völlunni minni
Á sólarströnd að kafna úr hita, með ískalt vatn undir bekknum
Í heitum potti við sumarbústað með ískalt hvítvín
Á ferðalagi um heiminn með Maríuna mína

Fjórir bloggarar sem ég klukka:

Guðrún
Helga Björg
Anna Rut (farðu nú að blogga kona!)
Fanney Dóra

Kreppan 1914?

2008-10-06T18:27:00.007Z

Nú vildi ég óska þess að ég hefði tekið betur eftir í sögunni hjá Sigga upp í Borgó, hvernig var kreppan 1914? Að hvaða leyti er ástandið nú sambærilegt því sem þá var? Ég veit samt ekki afhverju ég vil vita það, ég held að manni myndi ekkert líða betur með það - kannski hef ég einhverja þörf fyrir að velta þessu fyrir mér...

---

Andrúmsloftið í vinnunni var skrítið í dag, það hefur verið mikil spenna undanfarið og stuttu fyrir ávarp forsætisráðherra gekk boðskort í Club Polly Anna um húsið - í grafalvarlegu gríni að sjálfsögðu. Við hlustuðum á ávarpið í gömlu útvarpi sem var með stóru loftneti. Það hefði verið hægt að skera andrúmsloftið. Þegar ávarpinu lauk og forsætisráðherra bað Guð að blessa þjóðina var mér næstum allri lokið.. mig langaði að leggjast í gólfið og gráta - að láta eins og krakki.

---

Það var ekki mikið unnið eftir ávarpið, ég fór og sótti Maríuhænuna mína sem var inni hjá Höllu með magaverki. Við renndum svo heim, skottann fékk smá knús og magaverkirnir hurfu eins og dögg fyrir sólu. Barnið er frammi í fótbolta núna :)

---

Hvað gerist á morgun? Það veit enginn held ég, ég nenni ekki að spá í því í kvöld. Ég ætla að skrá mig í Club Polly Anna

"Alþjóðlegur vandi"

2008-10-02T20:15:00.002Z

Mig langaði að blogga en samt ekki. Ég er að hlusta á ræðusnillinginn Steingrím Joð lesa ríkisstjórninni pistilinn. Ég er ekki vinstri græn en mér finnst alltaf jafn gaman að hlusta á hann. Kaffistofan í vinnunni er góður staður á tímum sem þessum, þar fær maður ýmsan fróðleik beint í æð. Ég er búin að læra ýmislegt síðustu daga, td að mynda að samingstaða Glitnis var verulega slæm og afskaplega tæpt sé að kenna illindum Davíðs og Jóns Ásgeirs. Glitnir hefði annars farið á hausinn. Veðin sem Glitnir bauð voru ekki pappírar sem teljast til góðra veða, meðal annars munu þar hafa verið bílalán og fasteignalán. Hagfræðingarnir á mínum vinnustað gera ráð fyrir því að um 60% skuldara eigi eftir að standa í skilum á næstum mánuðum sé litið til annarra lána en húsnæðislána, en þar má víst búast við allt að 90% skilum.

---

Það var mikið hlegið af frösum ráðamanna á borð við að þetta sé nú alþjóðlegur vandi og við eigum að snúa bökum saman. Að hluta til er okkar vandi alþjóðlegur en að hluta erum við að súpa seyðið af þvílíku eyðslufylleríi síðustu ára, vandinn er svo "alþjóðlegur" að eina landið í heiminum sem glímir við sama vanda og við í dag er Kazakstan... En að snúa bökum saman, jú jú við getum við snúið bökum saman en hvað svo? Eigum við kannski bara að botna Stuðmannlagið og þakka fyrir góða aldurssamsetningu þjóðarinnar?

---

Ég hef ekki hugmynd en snillingurinn sem ég vísaði til hér fyrr komst svo skemmtilega að orði áðan: Áhöfn í lekum bát sest ekki niður til að velta því fyrir sér afhverju fór að leka heldur byrja þeir að ausa. Bankar og ríkið þurfa að finna lausn. Ég segi Go Jóhanna! og held áfram að horfa á Alþingi..

Þegar barnið veit betur

2008-09-30T19:44:00.005Z

Ég man alltaf eftir því þegar ég hlustaði á fyrirlestur hjá Hugó fyrir nokkrum árum og hann sagði að foreldrar spyrðu börnin nánast undantekningalaust hvað þau vildu fá í matinn þegar foreldrarnir vildu sukka. Ég lenti í þessum aðstæðum í dag.

---

Í dag fórum við mæðgur á búðarbrölti eftir vinnu og klukkan orðin ansi margt þegar við erum á leið út úr Smáralindinni. Ég stakk upp á því að við myndum bara fá okkur pyslu í kvöldmat.. nei barnið var ekki til í það. Þá stakk ég upp á því að við myndum steikja okkur hamborgara... nei barnið var ekki til í það. Hún gekk rakleitt að fiskborðinu í Hagkaup og velti fyrir sér hvernig fiskrétt hana langaði í - barnið valdi plokkara. Hún var reyndar smá stund að velja á milli plokkara og ýsu í Malasíusósu. Ég gat hreinlega ekki neitað barninu um plokkara og sagt að við yrðum að kaupa hamborgara - sem hún nb veit að eru óhollir og kosta meira en plokkarinn. Við enduðum því með plokkara í matinn.

---

Pabbi minn er sterkari en pabbi þinn

2008-09-23T21:51:00.004Z

Eins of flestir horfði ég á Kompás í gærkvöldi. Ég var kannski ekkert sérstaklega sjokkeruð á þessu, enda hardcore lady.. djók. Mér fannst þátturinn alveg ágætur, ekkert meira en það. Mér fannst vanta meiri dýpt í umfjöllunina og meiri dýnamík í þáttinn sjálfan - svo var það blessuð kræklingaræktin sem kom á eftir sem drap alveg stemmninguna.

---

En umræðan í dag hefur mér þótt með eindæmum leiðinleg. Fólk eyðir þvílíkum tíma í að ræða um þessa blessuðu menn. Af hverju ræðir enginn handrukkun per se eða bara löggumanninn sem var vinnufélagi annars þeirra? Mér finnst það skipta miklu meira máli ...

Stjörnuspár, geðillska og dagblöð

2008-09-20T18:06:00.003Z

Stundum (eða kannski oft) kíki ég á stjörnuspána mína á mbl.is eða dreg spil á spamadur.is. Yfirleitt alltaf fæ ég þau svör sem ég er að leita að hverju sinni, nema í dag þá var stjörnuspáin mín á mbl.is fáránleg - þar var sagt að mig langaði að koma einhverjum undir græna torfu!!! Kannski er þar undirmeðvitundin að láta á sér kræla en ég kannast ekki við þessar pælingar ... Ég elska stjörnuspána þegar hún segir mér það sem ég vil heyra og það sem ég er að hugsa. Call me crazy.. I know.

---

Það er samt svo margt að flækjast í hausnum á mér þessa dagana, það er stutt í geðvonskuna og gleðina. Ég er eins og íslenska veðrið, breytist oft á dag. Kannski er tóbaksleysið að tala, ég vil alla vega kenna því um geðsveiflurnar. Ég ákvað það þegar ég vaknaði í morgun að gera ekki neitt í allan dag og vera í náttfötunum þangað til á morgun. Það entist ekki lengi, mikið svakalega er leiðinlegt að gera ekki neitt. Mér þótti það svo leiðinlegt að ég er búin að þrífa ísskápinn og byrjuð á eldhússkápunum. Svo skellti ég mér niður og nældi mér í góðan haug af dagblöðum því ég ætla að pakka niður í kassa - ég flyt einn daginn, svo það er eins gott að vera búin að þessu.

---

En talandi um dagblöð, ég bað dóttir mína að fara niður og sækja dagblöð fyrir mig til að pakka einhverju niður. Hún kom eftir dágóða stund og sagði mér að það væri ekkert dagblað niðri en hún hélt samt á góðum bunka. Þegar ég benti henni á að hún héldi á nokkrum sagði hún réttilega við mig: "Þetta eru 24stundir og Fréttablaðið - ég fann ekkert sem heitir Dagblað!"

Kláralega hressasta kaffistofa landsins í dag

2008-09-19T13:24:00.003Z

Vissir þú að.... þegar dóttir krataforingjans og sonur íhaldsforingjans trúlofuðu sig lagðist íhaldið í rúmið og gat sig hvergi hreyft þar til kunningi benti honum á þetta væri nú ekki alslæmt - íhaldið væri nú alltaf ofan á... (Já, nema þau tækju upp kratasiði og prufuðu nýja hluti - sem kunninginnn hefur ábyggilega ekki bent á)

Hvað er málið???

2008-09-17T20:14:00.011Z

Ég opnaði tölvupóstinn minn áðan eins og ég geri svo gjarnan á heila tímanum.. fríkeypis skipulagsráð frá JTJ. Nema hvað að þegar ég flétti í gegnum hrúguna fann ég mjög svo sérstakt bréf. Í því stóð:

---

"HelloAm Rita,fair in complexion,tall hot in bed.and loving and caring young lady with good understanding and sharing in nature i decided to contact you at www.barnaland.is ) do contact me through this my id so that we know each other better and share pictures to ourselves.Hope to hear from you and bye with a warmly kissssssssssss. Rita"

---

Á barnaland.is eru í flestum tilfellum bara myndir af börnum - hvaða máli skiptir þá að gellan sé hot in bed?

Næst á svið..

2008-09-15T21:46:00.006Z

... er Ásdís Ýr ballettdansmær frá Ballettskóla Guðbjargar Björgvins! Hljómar þetta ekki vel? Ekki falla í yfirlið, ég er ekki farin að æfa ballett en ég fékk samt gott boð í dag frá ballettkennararnum hennar Maríu. Þar eru í boði balletttímar fyrir foreldra, allt frá algjörum byrjendum til gamalla dansara. Nema hvað samtal okkar var eitthvað á þessa leið:

Kennari: Þú vilt ekki koma í ballettinn sem er núna í gangi, þetta eru foreldrar margra krakka hérna - passar akkúrat við tímann hennar Maríu? Ásdís tilvonandi ballettdansmær: Uhh, ég er veit það ekki.. ég er svo strið að ég yrði eins og álfur þarna Kennari: Elskan mín, heldurðu að þú getir ekki lyft fætinum upp á stöngina? Ásdís tilvonandi ballettdansmær: (Hóstar) nei, ég held ekki sko Kennari: Iss, ég verð fjót að teygja það úr þér. Hugsaðu alla vega um það!

Ég komst í splitt í nokkur skipti þegar ég var 14 ára (eða 15 ára). Þau voru ekki mörg, en ég komst. Ætli ég yrði ekki létt á mér og tignarleg á sviðinu í tutupilsi með celló á rassinum?

7 ár...

2008-09-13T18:28:00.002Z

Mér finnst svo stutt, en samt svo langt síðan að ég var að elda lasange með skrítnar pílur í maganum.. sem voru hríðir. Það eru komin sjö ár síðan. Yndislega dóttir mín verður 7 ára á morgun. Það er gaman að rifja þetta upp...

---

1.september 2001 fluttum við Nonni í íbúð upp í Grafarvogi sem við höfðum á leigu, ég var orðin eins og hvalur (að mér fannst) - slagaði upp í 70kg sem mér fannst ótrúlega mikið verandi komin 9 mánuði á leið. Þegar við vorum búin að koma okkur fyrir eyddi ég öllum mínum tíma í að baka Betty Crocker, borða Betty Crocker og drekka nýmjólk með. Ég straujaði bleiur, bjó um vögguna í mismunandi útfærslum og h0rfði á sjónvarpið.

---

Þegar 13.september leit dagins ljós flaug mér ekki í hug að hann ætti eftir að verða eitthvað öðruvísi en aðrir dagar, ég byrjaði að elda kvöldmatinn fljótlega eftir hádegismatinn og fór með Nonna og sótti nokkar dvd myndir til ða horfa á. Þegar ég var að leggja lokahönd á margra klukkutíma matreiðsluna, lasange, fór ég að fá skrítnar pílur í magann og bakið. Eftir matinn lagðist ég í sófann og fór að glápa á sjónvarpið. Þessir skrítnu verkir ágerðust þegar leið á kvöldið og nóttina, ég gat ekki sofnað en Nonni var alveg að leka út af og það sætti ég mig ekki við. ÉG vildi að hann myndi horfa á mig en ekki tala við mig.

---

Um miðja nótt ákváðum við að fara upp á spítala til að láta tékka á þessu. Mamma ætlaði að vera með okkur svo ég hringdi í hana til að láta hana vita, ég sagði henni að ég myndi hringja í hana af spítalanum og láta hana vita hvernig staðan væri. Ég gleymi aldrei andartakinu þegar ég við hringdum bjöllunni, mér fannst það svo vandræðalegt - hvað á maður að segja: .."Hæ, ég er að koma að fæða barn!"

---

Við vorum rétt nýkomin inn þegar mamma mætti, hún var greinilega tilbúin í gírinn með myndavélina um hálsinn og íþróttatösku fulla af nesti, nuddolíum og alls konar dóti. Við tók nokkurra klukkutíma bið - mig minnir að við höfum við komin um fjögurleytið um nóttina og María er fædd í hádeginu. Fæðingin gekk bara nokkuð vel, ég fylgdist vel með klukkunni og taldi niður tímann fram að hádegi - ljósan hafði sagt að hún myndi fæðast þá.

---

Fyrir fæðinguna var ég búin að gera rosalega fínan óskalista þar sem óskir mínar komu fram, sorry en hverjum datt í hug að láta frumbyrju fá þá flugu í hausinn að hún gæti stýrt þessu eitthvað. Óskalistinn gleymdist heima en jeminn hvað hann var úr takti við raunveruleikann. Til að mynda sagði ég við ljósuna að ég vildi fara í gegnum fæðinguna án deyfingar, ss vildi ekki að mér væri boðið neitt og ég vildi vera sem mest á ferðinni en ekki í rúminu. Ég vildi ekki eiga á bakinu og só on. Til að gera langa sögu stutta var ég farin að heimta verkjalyf fljótlega eftir að ég kom, ég lá á grjónapúða upp í rúmi nánast allan tímann og ég átti á bakinu :)

---

Fæðingin sjálf er samt ansi gloppótt í minninu, ég man eftir einstaka mómentum en ekki öllu. Ég man samt svo vel eftir því þegar ljósan klappaði mér á öxlina og hrósaði mér fyrir það hvað ég var dugleg - ég lifði lengi á þessu hrósi þrátt fyrir að nokkru seinna hafði ég heyrt að þær segja þetta við alla.

---

En nóg um það, á morgun eru 7 ár síðan ...

Hamstrar og samkynhneigð

2008-09-08T00:02:00.004Z

Fyrir nokkru síðan skrifaði ég pistil um hvernig mann ég vildi fá að eiga fyrir mig - bara fyrir mig. Mörgum fannst ég vera óraunhæf og sögðu að þessi maður væri ekki til. Ein vinkona mín gekk svo langt að segja að ástæðan fyrir því að ég væri ein væri sú að ég vildi það sem ég gæti ekki fengið til að vera alltaf ein, ætli það sé rétt? Ég barasta veit það ekki, ég veit samt alveg hvað ég vil og ég veit að það er ekki í boði.

---

Kannski langar mig bara í þessa ímynd, fjölskyldumyndina. Mig langar að skipuleggja barneignir með fullkomnum manni, mig langar að hafa einhvern heima á kvöldin og taka þátt í lífinu með mér. Ég nenni ekki að hanga á msn öll kvöld, ein fyrir framan tölvuna heima hjá mér. Ég nenni ekki að þurfa að hringja ef mig langar að tala við einhvern, mig langar að geta snúið mér við og spjallað án þess að tækni þurfi að koma þar við.

---

Ég er pirruð

Sveitasælan

2008-09-07T21:06:00.002Z

Þá erum við mæðgur komnar heim - reyndar sú yngri fór á hitt heimilið í Breiðholtinu. Það er einhver ákveðinn sjarmi yfir þessari helgi, allir koma í sveitina og yfirleitt er leiðinlegt veður - sem þykir reyndar betra veður til að smala en gott veður, skrítið. Þegar við mættum á föstudagskvöldið var komið myrkur enda miðnætti, bóndinn var úti á hlaði að dytta að fjárkerrunni og bræðurnir tvær stóðu álengdar og fylgdust með. Þegar bóndinn hafði orð á því að viðgerðin gengi ekki upp sagði annar bróðirinn, smiðurinn í fjölskyldunni, að hann þyrfti bara að reyna aðeins betur. Ég skilaði mömmu af mér og hélt af stað aðeins lengra heim til Rögnu frænku.

---

Ég bar Maríu inn steinsofandi og setti hana á dýnuna í "okkar" herbergi. Við Ragna sátum á snakki langt fram eftir nóttu enda langt síðan við höfum fengið tækifæri til þess - eða síðan við höfum gefið okkur tækifæri til þess. Á laugardagsmorgun var ég síðust á fætur, við þurftum bara að mæta í fyrirstöðu svo við þurftum ekki að vera snemma á ferðinni í sveitina. Rétt eftir hádegi fórum við af stað og lögðum bílunum utan vegar og biðum eftir fé. Meðan við biðum rifjuðum við upp gamla tíma - traktorsferðirnar, djúsbrúsana og súkkulaðikexið sem amma gaf okkur alltaf í nesti. Við sórum þess eið að á næsti ári færum við með stelpurnar upp í fjall enda allt of langt síðan síðast.

---

Þessi smölun var viðburðarríkari en flestar aðrar, í fyrsta skipti í sögu búskapar á okkar bæ kom lögreglan og sótti einn gagnamann og flutti hann í fangageymslur. Jafnframt keyrði eitt fjórhjólið á bíl frænku upp í dal og skemmdi hann. Mennirnir eru alls óskyldir okkur :) Við frænkurnar þurftum aðeins að láta í okkur heyra þegar fjárhópur tók stefnuna til okkar, að sjálfsögðu hljómuðum við eins og hálfvitar en vá hvað það var gaman. Auk þess reyndum við eftir fremsta megni að láta lögregluna sjá okkur í þeirri von að önnur okkar færi í járn - því jú löggan á þessum slóðum er ekkert slor :)

---

Svo var farið í réttina að draga. Eitt borgarbarnið var eitthvað óhresst með tímann sem það tók að fara í réttina og spurði mig: Ásdís, hvenær förum við eiginlega í ræktina og sorterum kindurnar? Við létum ræktina vera þennan daginn, sem og aðra. Það er svo gaman í réttinni, þó ég ráðist nú bara á lömbin. Ég ákvað að ná mér í eina rollu og þá lenti ég á rassgatinu - lömbin voru mín deild. Það voru þreyttir og skítugir kroppar sem komu svo til Skagastrandar í gærkvöldi.

---

Fljótlega eftir hádegi gerðum við okkur ferðbúnar og fórum af stað heim. Þar sem ég pakkaði svo litlu var lítið til að taka með heim, ég var svo dugleg að pakka að ég gleymdi ýmislegu nauðsynlegu svo sem nærfötum, sokkum og utanyfirfötum. Utanyfirfötin fékk ég lánuð fyrir norðan en sokkana og nærfötin verslaði ég á leiðinni. Spurning um að pakka létt eða bara of létt?

---

Á morgun tekur við löng vinnuvika, þrátt fyrir að búa nánast í vinnuna þessa dagana þá skulda ég tíma frá síðustu viku og ef bókhaldið mitt er nógu gott þá þarf ég að vinna aukalega 6 tíma í þessari viku. Stefnan er tekin á bólið snemma í kvöld.

Að muna eða muna ekki

2008-09-03T01:07:00.005Z

Stundum er sagt að ég muni allt, ég man mjög mikið úr fortíðinni og samtíðinni - oftast hluti sem engu máli skipta. Stundum hef ég velt því fyrir mér hvort hægt sé að breyta því sem liðið er, og alltaf komist að þeirri niðurstöðu að svo sé ekki. Learning by doing sagði einn mjög svo gáfaður maður... fortíðin er til að læra af - og ekkert annað ... jú kannski líka hlægja að. Svo getur maður lent í því, líka við sem teljum okkur muna allt, að það sem við munum er ekki rétt. Það getur verið spaugilegt og já líka háalvarlegt - allt eftir því hvernig litið er á málin. En hvað er þá rétt, það sem við munum eða það sem hinir muna? Kannski er þetta spurning um það sem við viljum muna...

Af typpum verður margur api

2008-08-31T23:57:00.003Z

Akureyri var frábær eins og alltaf - þúsund þakkir fyrir mig....

Lífið er ljúft

2008-08-22T13:28:00.001Z

Hjá mér eins og hjá öllum öðrum skiptast á skin og skúrir í önnum hversdagsins. Undanfarið hafa verið frekar óþægilegir tímar, óvissa með ýmislegt og pirringur yfir öðru. En svo var eins og amma gamla hefði kippt í spotta. Framundan eru skemmtilegir tímar.

---

Ég er búin að fá stöðuhækkun í vinnunni sem þýðir afmarkaðra starf, mun skemmtilegra en það sem ég hef verið að sinna og er sambland af mínu námi og opinberri stjórnsýslu - sem mig hefur lengi langað að læra. Þegar ritgerðin er frá hef ég leyfi til að mennta mig á því sviði með vinnunni til að styrkja mína stöðu. Auk þess mun ég fá mjög góða vinnuaðstöðu, bara fyrir mig.

---

Fyrir stuttu var mér svo boðin kennsla í mínu gamla námi. Ég kenni eitt námskeið ein, helminginn af öðru og hluta af þriðja. Ég hef aðeins kennt með Hönnu minni en núna fæ ég svona "fullorðinskennslu" þar sem reynir á mig og mína þekkingu. Fyrir 6 árum síðan ætlaði ég að verða kennari - reyndar grunnskólakennari :)

---

Húsnæðismálin eru ennþá óleyst en ég hef einhvern veginn engar áhyggjur af þeim núna, ég veit að þetta reddast allt saman á endanum og ég flyt í litla kósý íbúð um áramótin - hvernig sem ég fer að því. Bílamálin eru leyst og við María verðum áfram á yndislega Súbbanum.

---

Það er rúm vika eftir af ritgerðarfríinu mínu og stefnan er á að ná að taka síðustu viðtölin fyrir ritgerðina á þessum tíma. Fjögur viðtöl hér í Reykjavík og 6-8 á Akureyri. Ég hlakka óstjórnlega til þegar ég fer með ritgerðina til að láta binda hana inn - mér finnst alveg yndislegt að það sé þarna einhvers staðar handan við hornið. Hanna mín er nú á ferðalagi með fræðilega hlutann og aðferðafræðina sem ég búin að púsla saman, næst fær hún drög að niðurstöðum. Svo er bara að púsla þessu öllu saman og skila!

---

Ég er bara ótrúlega sátt við lífið og tilveruna eins og hún er í dag.

Stundum er nauðsynlegt að flytja

2008-08-18T23:28:00.005Z

Já, veistu ég held það bara - það er nauðsynlegt að flytja annað slagið og grisja aðeins draslið sem maður safnar. Þegar maður býr lengi á sama stað hættir maður að taka eftir því sem maður þarf ekkert að nota. María var lasin heima í dag svo ég var aðeins að dunda mér í geymslunni á meðan hún fékk vinnutækið mitt lánað aka. tölvuna.

---

Þegar ég flutti hingað fyrir rúmum tveimur árum fannst mér það gríðarlegur kostur hvað geymslan var stór. Þegar ég bjó á Hjónagörðum var geymslan lítið frímerki þar sem ég geymdi allt sem ekki var notað daglega, til dæmis straujárn og þess háttar (íbúðin var sko líka frímerki). Svo flutti ég úr tvistinum yfir í sexuna og fékk aðeins stærri geymslu. Ókosturinn við þá geymslu var að maður þurfti að fara út á bílaplan til að komast í geymsluganginn. Þegar ég flutti þaðan man ég ekki til þess að geymslan hafi verið neitt troðfull af einhverju drasli heldur bara svona týpísku geymsludóti - útilegudótið og svoleiðis.

---

Geymslan hérna í tíunni er svipað stór og íbúðin á Hjónagörðum - eða alla vega stofan :) Þegar ég flutti ákvað ég að gerast sveitó og hafa hluta af geymslunni fyrir búr þar sem gengið er í geymsluna úr eldhúsinu. Nema hvað að búrdraumurin dó fljótlega því ég fór að skella öllum fjandanum þarna inn. Undanfarna mánuði hefur verið nokkuð mál að komast með góðu móti inni blessað geymsluskotið þótt ég hafi ekki fyrir svo löngu rutt öllu þar út, raðað upp á nýtt og hent bílförmum af drasli.

---

Eitt af því sem fær að fjúka þarna inn eru pokar af plastflöskum og áldósum. Sökum þess hve geymslan er "rúmgóð" er farið mun sjaldnar í Endurvinnsluna en í den. Í dag ákvað ég að það væri kominn tími til að fara með þetta í Endurvinnsluna og græja eitthvað á þessu svona á síðustu og verstu tímum. Ég eyddi því drúgum hluta dagsins í að telja flöskur og dósir í nýja poka - ég hafði náttúrulega ekki hugvit í að telja í pokana þegar ég henti þessu inn svo ég fékk það verkefni í dag. Mikið lifandis skelfingar ósköp er það leiðinlegt verk. Nema hvað, í geymslunni minni voru hvorki meira né minna en 350 plastflöskur og 57 áldósir sjáanlegar - sem gera 8 ruslapokar af flöskum og dósum. Það er spurning hvað fleira leynist þarna?

Svona var sumarið 2008

2008-08-17T22:54:00.002Z

Nú er sumarið senn á enda, skólinn að byrja hjá drottningunni á föstudaginn og ritgerðarfríið mitt búið eftir 2 vikur. Því er ekki seinna vænna en að rifja upp sumarið....

Sumarið byrjaði um hvítasunnuhelgina á Akureyri. Frábært djamm á laugardeginum og fermingarveisla á sunnudeginum.
Aftur á Akureyri, brilliant brúðkaup hjá Völlu og Adda. Lopapeysa, hvítvín og berar iljar.
Fór í vikuferð til Krítar með Guðrúnu, Sunnefu og Victoríu. Sól, sjór og bjúgur.
Fyrsta helgin í júlí var tekin í sumarbústað á Blönduósi með mömmu, Óla frænda, Maríu, Önnu Maríu og Ottó Má.
Síðasta helgin í júlí var fyrsta útileguhelgi sumarsins (snemma í því). Fórum á Skagaströnd og tjölduðum í blíðskaparveðri.
Versló var svo tekin með Helgunni minni í Varmalandi. Ljósavél, rok og frábær félagsskapur.
Sumarbústaður í Brekkuskógi aðra vikuna í ágúst. Skrifaði nokkuð þéttan texta, pirraðist úr í Word, bakaði og bjó til sultu.

Nú eru bara tvær vikur eftir af ritgerðarfríinu mínu og ég verð að vera komin með uppkast af ritgerðinni ef mér á að takast að púsla saman öllu sem ég er búin að lofa mér í. Þann 1.september byrja ég í nýju starfi í vinnunni, fer að kenna eitt námskeið og hluta af tveimur öðrum (ef allt gengur eftir). Aðra hvora helgi mun ég svo þjóna góðu fólki nokkra tíma á dag. Planið er svo að skila ritgerðinni tilbúinni í innanhúslestur 15.desember og útskrifast í febrúar 2009.

Tannálfurinn

2008-08-07T14:09:00.003Z

Tannálfurinn var tíður gestur á mínu tímabili þegar allar 8 tennurnar hrundu úr dóttir minni eins og hendi væri veifað. Skottan var fjót að átta sig á því að tannálfurinn væri nú samt ekki til þótt hún fengi 100 kall undir koddann fyrir hverja tönn. Svo fannst henni voðalegt sport þegar Anna María missti fyrstu tönnina sína að fá að vera tannálfurinn hennar - Anna María var svo með svaka sögu um tannálfinn en María gat þagað um sitt hlutverk og ég veit ekki betur en að hún hafi haldið því fyrir sig - um það var alla vega samið.

---

En allt um það, ég man ekki hvort ég fékk eitthvað tannfé þegar ég var lítil né heldur hef ég spurt í kringum mig hvort börn vinkenna minna fá tannfé. Mér fannst hæfilegt að miða við 100 kall eða 1 evru (eftir því hvar við erum staddar) fyrir hverja tönn sem dettur, María setur þetta beint í baukinn sinn svo það verða aldrei miklar umræður um þetta. Í Selinu í morgun var skólafélagi Maríu hæst ánægður með að hafa misst tvær tennur nýlega - hann sýndi mér hvar þær höfðu verið og ræddi heilmikið um ristað brauð og ýmis vandræði sem fylgdu því að hafa lausa tönn.

---

Svo spurði ég hann hvort tannálfurinn hefði heimsótt hann, jú jú hann hafði gert það og kauði fékk 2000 krónur undir koddann! Ég átti ekki til orð og spurði hann hvaða tannálfur kæmi eiginlega heim til hans, það stóð ekki á svari - það er víst sá sem sér um vesturbæinn. Sá er ansi gjafmildur - 1000 krónur á tönn. Mér finnst þetta algjört brjálæði - og ég vorkenni mínu barni ef umræður skapast í skólanum um tannálfa og tannfé - reyndar veit hún að tannálfurinn er ekki til svo það kannski dregur aðeins úr henni. Glætan að ég fari að setja 1000 krónur undir koddann hjá henni fyrir hverja tönn sem hún missir - miðað við vesturbæjartannálfinn þá skulda ég reyndar Maríu 7200 krónur.

Að koma sér af stað...

2008-08-05T13:00:00.002Z

... er fáránlega erfitt eftir langt helgarfrí. Ég tók mér frí á föstudaginn því brottför í ferðalagið góða var á ætlun milli kl. 12 og 14 á föstudag. Ég var auðvitað á síðasta snúning eins og stundum áður og með allt of mikið af farangri - nágrannakona mín spurði mig í fullri einlægni hvort ég væri að flytja þegar ég bar dótið niður. Hún skellti upp úr þegar ég sagðist bara vera á leiðinni í útilegu.

---

Örlítil seinkun var á áður auglýstri brottför en Súbbinn og Pattinn brunuðu frá Akranesi kl. 14.30. Tæpum klukkutíma síðar vorum við komin á áfangastað, ég fór sem sagt með Helgu minni og Gulla hennar að Varmalandi. Þar komu líka fjölskyldan hans Gulla og ljósavélin góða. Ég hef sjaldan hlegið eins mikið með ókunnugu fólki en samt fundist ég ekkert ókunnug - enda kom á daginn að Gulli og co eru frá Þyrli í Hvalfirði en þar bjó Siggi hennar mömmu fyrstu árin sín og systir hans Gulla var í Tulsa með Jennýju, Jóa, Óla litla, Óla og Steingerði. Við Helga höfum verið alltof latar að gera eitthvað saman síðastliðin ár, miðað við að við vorum óaðskiljanlegar allan framhaldsskólann. Samt var bara eins og við höfðum ekkert misst neitt samband.

---

Við vorum mest á tjaldsvæðinu en fórum þó og skoðuðum Paradísarlaut og Glanna og skelltum okkur eina ferð í sund - potturinn var með þeim heitari sem ég hef kynnst, ég höndlaði hann ekki þrátt fyrir að vera þokkalega hott gella í dýrari týpunni af bikiní. Áður en við fórum heim í gær brunuðum við í Hreðavatnsskála og fengum okkur feitan borgara - við vorum náttla lítið búin að borða yfir helgina.

---

Helga, Gulli og þið öll hin þúsund þakkir fyrir frábæra helgi.

Skilgreining Peters á menntun? HJÁLP

2008-07-31T14:14:00.002Z

Man einhver hvar þessa blessuðu skilgreingu er að finna? Við lærðum þetta orð fyrir orð þegar við tókum Innganginn? Ég er búin að fara í gegnum alla Exploring Education og þar finn ég bara vangaveltur Peters um the educated man..... er það það sama??

.... illa girtar meyjar

2008-07-29T16:19:00.003Z

Talsverð umræða hefur verið í þjóðfélaginu um lag Baggalúts um Þjóðhátið í Eyjum. Ég er kannski svona rotin að innan en mér finnst þetta bara þrælfyndið - ég get ekki séð að það sé verið að hvetja til nauðgana nema fólk kjósi að oftúlka einstaka setningar. Þjóðhátið er lausgirt hátíð einhleypra - ég held því miður að það sé ekki of sagt að margir vita ekkert endilega hver setti í hvern ...

Textann við lagið og lagið sjálft má finna hér

Nautið 28.júlí 2008

2008-07-28T11:10:00.000Z

"Þú ræðst í áskoranir og drauma. Ekki hengja þig í smáatriði eða hræðast að geta ekki gert allt. Allt verður auðvelt ef þú bara nýtur þess."

Það sem koma skal

2008-07-24T00:43:00.002Z

Nú er að koma að því, ég get ekki flúið það mikið lengur að spá í því hvað við María gerum um áramótin. Við þurfum að flytja héðan 5.janúar nk. Sama þótt ég færi í eitthvað nám fengi ég ekki að vera lengur - búin með kvótann. En hvernig á maður að fara að?

---

Ég skil ekki hvernig þetta á allt að ganga upp. Húsaleiga fyrir 3ja herbergja íbúð fer ekki undir 110.000 á mánuði, algengt verð virðist vera 150-170.000 á mánuði. Mjög svipuð upphæð færi í að greiða af lánum og öllu tilheyrandi ef maður skyldi kaupa. Frístundaheimili kostar 10.000 á mánuði, sem er nauðsynlegt að borga svo hægt sé að vinna fullan vinnudag. Matur fyrir í skólamötuneyti kostar 5325 á mánuði. Í dag borga ég 7.000 á mánuði í hita, rafmagn og internet. Þetta gerir tæpar 200.000 krónur á mánuði, þetta eru allt greiðslur sem ekki er hægt að komast hjá og fullt vantar inn í ss síma, tryggingar, RÚV, rekstur á bíl, íþróttir og gamlar syndir. Gert er ráð fyrir því að einstaklingur með eitt barn þurfi að lágmarki 68.700 á mánuði í mat, hreinlætisvörur, frístundir, læknisþjónustu, fatakaup og "ýmislegt" samkvæmt Ráðgjafarstofu heimilanna. Kannski er ég ótrúlega svartsýn en ég er bara ekki að sjá þetta ganga upp.

---

Hvenær ætlar blessaða ríkistjórnin okkar að vakna og sjá að þjóðfélagið okkar er ekki ganga upp, samkvæmt fræðingunum á húsnæðiskostnaður að vera þriðjungur af útborgðuðum launum til að boginn sé "rétt" spenntur - þeas til að hann þoli minni háttar áföll. Samkvæmt því ætti einstaklingur sem borgar 150.000 í leigu að vera með 450.000 í útborguð laun á mánuði.

---

Þið fyrirgefið tuðið - skárra að lesa þetta hér heldur en að hlusta á mig kvarta og kveina í símann ekki satt??

Hvað þarf marga til að skipta um ljósaperu?

2008-07-22T23:31:00.004Z

Daman fór í lit og klipp í dag til Önnu Siggu - kom út hæstánægð eins og alltaf. Nema hvað að ég gluggaði í Vikuna með ég beið með litinn og rakst á skemmtilegar pælingar um stjörnumerkin.. nokkrar þeirra áttu svo vel við ákveðna aðila ...

Naut: Einn, reyndu að segja að peran sé ónýt og best sé að skipta henni út og svo þurfi að henda henni
Tvíburi: Tvo, þeir skipta samt aldrei um peru heldur ræða um það hver á gera það og afhverju þurfi að skipta um peru
Meyja: Um það bil einn með skekkjumörkum +/- milljón
Bogmaður: Sólin skín, dagurinn er ungur, allt lífið er framundan og þú hefur áhyggjur af ljósaperu!
Steingeit: Eyðum ekki tíma í þessa barnalegu brandara

Sérfræðingur eða kollegi

2008-07-22T14:53:00.003Z

Mér finnst alltaf pínulítið kjánalegt og jafnvel óþægilegt þegar fólk spyr mig að einhverju um mitt sérsvið og jafnvel kallar mig sérfræðing á því sviði, eða hvað þá þegar fólk spyr um kollega mína - þær Valgerði og Hildi Höllu... mér finnst maður ekki eignast kollega fyrr en á fimmtugsaldri. Kannski er þetta spurning um sjálfstraust, því jú eitthvað hlýtur maður að hafa lært á fimm árum í háskóla.

---

Dagurinn í dag fór í lestur á lagatextum, umsögnum, greinargerðum, ræðum og fleiri skemmtilegheitum frá Alþingi. Mér finnst lúmst gaman að lögum og reglugerðum, kannski af því ég get verið svo ferköntuð stundum :) Nýju grunnskólalögin eru mjög sérstök fyrir margar sakir og tímamótalög að vissu leyti en að mörgu leyti fara þau aftur til eldri lagasetninga hvað varðar minn hóp. Mikil gagnrýni kom frá ýmsum hagsmunahópnum þegar frumvarpið var lagt fram en ég get ekki séð að sú gagnrýni sem kom á klausur er varða nemendur með sérþarfir hafi fengið jafn mikið vægi og sú gagnrýni sem kom á "kristilegt siðgæði" á sínum tíma.

---

Fyrrum kennari minn úr BA náminu kom að spjalla við mig og við áttum gott og skemmtilegt spjall um nýju lögin, krakka með ADHD, SMT-og PMT agastjórnunarkerfin og þess háttar. Í samtalinu vísaði hún til mín sem sérfræðings í þessum málum, sérfræðingur er fyrir mér alvitur einstaklingur sem er orðinn nokkuð gamall. Það er ég ekki, hvorki alvitur né gömul. Kannski aftur, spurning um sjálfstraust. Ég veit margt um þetta efni, en ekki allt.

---

Ég átti líka samtal við annan einstakling sem var á öndverðum meiði við mig í þessum málum, ég kvíði fyrir því að kynna efni ritgerðarinnar og mæta fleira fólki með þær skoðanir - því jú, þeir sem eru á öndverðum meiði við mig eru fleiri en þeir sem mér eru sammála. Allt spurning um vald ráðandi hópa.

--- En kollegar mínir, ég hvet ykkur til að kíkja á nýju lögin :)

Sumarið er að verða búið...

2008-07-22T09:56:00.005Z

... og mér finnst ég ekkert hafa gert "sumarlegt". Það sem af er sumri hef ég farið til Akureyrar í 2 helgarferðir, eina ferð norður á Blönduós og svo viku til Krítar. Næsta helgi verður tekin á Skagaströnd city og svo er það sumarbústaður í ágúst. Þegar sumarið kveður mun ég hafa fest tjaldvagninn einu sinni aftan í bílinn. Þegar fjárfest var í gripnum var ákveðið að vera alltaf í útilegu, ég fer aldrei í útilegu samt búin að eiga gripinn núna í 3 ár. Góð kaup þar.

--- Mér finnst ég hafa verið svo upptekin en samt hef ég ekki gert margt.

Barnið grét...

2008-07-15T23:01:00.003Z

... yfir lokaþættinum af Age of Love og gat ekki hætt að gráta. Hún ætlar greinilega að erfa stáltaugarnar hennar mömmu sinnar.

Blettatígur með bólgið auga

2008-07-15T00:32:00.008Z

Frá því ég fæddist á stofu 6 á Héraðshæli Austur Húnvetninga hef ég verið B manneskja, eða svo gott sem. Mér finnst best að vinna fram á nótt og þegar ég var sem mest í námskeiðum sátum við og lásum (og hlógum) í Odda þar til við vorum nánast reknar út úr húsinu - ýtið bara á "push to open" sagði einn öryggisvörðurinn við okkur þegar við héldum að við værum læstar inni.

---

Mér finnst algjörlega ómögulegt að fara snemma að sofa og að sjálfsögðu er mér ókleift að vakna fyrr en um sjö, hálf átta á morgnana í fyrsta lagi. Sem betur fer mæti ég ekki til vinnu fyrr en níu og Melaskóli byrjar ekki fyrr en hálf níu - gjörsamlega sniðið fyrir okkur mæðgur. Yndið mitt er nefnilega alveg eins og ég, hún nennir mjög sjaldan á fætur á morgana og er lengi að sofna á kvöldin. Litla dýrið er klædd í föt og fær morgunmat á skrifborðið sitt inn til sín - annars tekur það heila eilífð að koma henni á fætur. Ef ég næ ekki að grípa hana þegar hún er búin með morgunmatinn fer hún aftur að sofa. Eitt sinn ætlaði ég að kvarta við mömmu undan þessari hegðun hjá barninu en hún hló bara, ég var víst svona líka :)

---

Ég ætlaði þó að breyta til í kvöld, fara að sofa fyrir miðnætti. Ég ákvað þó að fara í sturtu fyrir svefninn og fara í smá beauty meðferð. Nema hvað, mig fór allt í einu að klægja svo svakalega í augað en pældi lítið í því fyrr en ég var búin að taka til augnbrúnalitinn. Ég hætti skyndilega við þegar ég sá að annað augað var eldrautt og stokkbólgið eins og á leikskólabarni með augnkvef. Jæja, ég ákvað að sleppa andlitsdúlleríi og skellti mér í sturtuna. Mér til mikillar ánægju steig ég úr sturtunni endurfædd sem blettatígur, fallega brúna húðin mín er öll að fara. Eftir að hafa borið á mig body butter ákvað ég að hætta við að fara snemma að sofa... það er alveg sama hvað ég geri, ég verð pottþétt með ljótuna á morgun.

---

Myndir frá bryllupinu á Akureyri eru hér

Það eru naumast viðbrögðin..

2008-07-13T21:40:00.010Z

.... við síðustu færslu - vill enginn að ég gangi út? Valla bauð mér aðstoð við ferminguna hennar Maríu þegar ég var að hjálpa henni fyrir bryllupið, ómeðvitað gerði hún ráð fyrir því að ég myndi ferma fyrr en gifta mig - greinilega fleiri sem hugsa svoleiðis :)

---

Ég er búin að vera frekar mikið á netinu undanfarna daga og bloggrúnturinn minn hefur ekki beint verið uppörvandi, allir að blogga um karlaleysi, kvennaleysi eða vonlausa kosti. Greinilegt að það tekur á sálina að vera single á þessum árstíma. Sumarið er svo skemmtilegur date tími, svona eins og hálfgerður fengitími.

---

Annars er helgin bara að verða búin og á morgun taka við ritgerðarskrif - sem nota bene ganga bara nokkuð vel! Hanna Björg gaf mér þvílíka vítamínsprautu í morgunkaffinu um daginn, ég kom mér fyrir við vinnuskrifborðið mitt í Gimli og vann eins og mófó enda kerlingar mínar í næsta nágrenni ef mig vantaði spjall eða truflun. Ég var ekki alveg að finna mig í Odda, þar er enginn þessa dagana og þögnin er þrúgandi. Þeir sem þekkja mig vita að lærdómur í þögn hefur aldrei verið mín sterka hlið.

---

Við María erum búnar að vera nokk duglegar þessa helgina, á föstudag fór sú stutta í flugferð með pabba sínum í 2 tíma um SV- landið. Á laugardag dúlluðumst við heima og fórum svo í Hafnarfjörðinn að hjálpa til við flutninga og það sem þarf að gera þar. Í dag réðumst við svo á herbergi heimasætunnar, það verk er enn óklárað en 4 pappakassar og 1 ruslapoki hafa kvatt alltof stóra herbergið hennar. Við gerðum smá hlé á tiltektinni og fórum í bíó á KungFu Panda. Þessi elska var búin að sjá myndina svo hún sagði mér alltaf hvað gerðist næst :)

---

Næsta helgi er svo pabbahelgi -aldrei að vita hvað maður gerir þá. Reyndar er ég að leita mér að smá helgarvinnu þær helgar sem hún er í burtu svo það er aldrei að vita nema maður verði að vinna - who know´s

----

En stelpur, ég var ekkert að grínast í síðustu færslu - komið mér á deit

Age of Love

2008-07-11T01:14:00.002Z

Ég er gjörsamlega húkkt á þessum hallærislega þætti - ég hlæ, græt, verð reið, afbrýðisöm og allan pakkann. Mig langar svo í fullkomið líf með fullkomnum manni. En samt langar mig líka að vera bara ein með Maríu það sem eftir er.

---

Mig langar að vakna á morgnana og fara að sofa með einhverjum sem ég elska og elskar mig út af lífinu. Mig langar í rómantískan karl sem vill allt fyrir mig gera en vill líka að ég sé sjálfstæð. Mig langar í karl sem sér ekki sólina fyrir mér og Maríu. Mig langar í karl sem langar ekkert í fyrrverandi kærustuna sína. Mig langar í karl sem heldur ekki framhjá. Mig langar í karl sem er ekki í neinni óreglu, í góðu starfi og með góða menntun. Mig langar í karl sem eldar, þrífur og tekur til. Mig langar í karl sem er handlaginn og getur reddað því sem þarf að redda. Mig langar í karl sem nennir að kúra með mér og horfa á vælu í sjónvarpinu og finnst það krúttlegt þegar ég sofna. Mig langar í karl sem fær mig til að brosa án þess að segja nokkuð.

---

Samt tel ég mér trú um það að mér langi bara að vera single það sem eftir er, búa okkur Maríu gott heimili í sætri íbúð í vesturbænum og ferðast með henni um heiminn án þess að nokkur karl trufli plön okkar. Því þrátt fyrir að mig langi í karl þá langar mig samt líka að geta gert það sem mig langar án þess að þurfa nokkuð að ræða það við nokkurn annan sem mögulega gæti haft skoðun á því sem ég þyrfti að melta. Mig langar samt svo mikið að vera á sama stað og margar vinkonur mínar, að bæta í barnahópinn, gifta sig og koma sér fyrir í framtíðarhúsnæði.

---

Stelpur - komið mér á date!

Af eplum og öðrum ávöxtum

2008-07-10T11:19:00.003Z

Sólin skín úti og ég sit inni við tölvuna. Ég fór og hitti Hönnu í morgunmat í gær, hún er svo yndisleg og svo mikið vítamínsprauta. Ég held að ef ég myndi hitta hana einu sinni í viku þá myndi ég rúlla þessari ritgerð upp á no-time. Ég þarf að taka nokkur fleiri viðtöl og lesa nokkrar ritgerðir uppi á safni - svo er ég bara búin með gagnsöfnun og þá er bara eftir að skrifa. Mér finnst gaman að skrifa og þá sérstaklega þegar mikið er komið á blaðið - þá er svo lítið eftir.

---

Hanna Björg sannfærði mig líka um að þetta væri skemmtileg ritgerð og mér fannst efnið mjög áhugvert eftir okkar samtal - var nefnilega komin með nett ógeð á því. Það er náttúrlega fáránlegt þegar lögum er breytt svo ráðandi hópar þurfi ekki lengur að brjóta lögin þegar verið að brjóta á rétti valdaminni einstaklinga. Minnir mann bara á maríjúnalöggjöfina í USA sem var mjög ströng þar til börn háttsettra aðila voru tekin að fá sér smók. Nema hvað að það eru ansi mjög ár síðan og maður hélt að Ísland ræki ekki svona stefnu.

---

Dagskrá dagins í dag er að setja upp hvern kafla, ss hvað á að vera í honum og hvað ekki. Á morgun ætla ég að skipuleggja allt lesefnið sem ég er með út frá þessum köflum.

IRONMASTER

2008-07-08T22:27:00.008Z

... já eða bara bloggmaster, ég er alla vega ekki master í fötlunarfræðum. En í síðustu færslu var ég nýkomin heim frá Akureyri - hölt. Í dag er ég ennþá hölt en nýkomin heim frá Blönduósi með smá millilendingu á Krít. Maja systa reddaði sennilega fætinum með því að draga glerbrot úr ilinni fyrr í dag :)

Við Guðrún vorum ss svo miklir snillingar að í byrjun maí pöntuðum við ferð til Krítar eins og margir vissu - flestir nema Sunnefa - en hún var að fara í sömu ferð með Vicktoríu. Hún vissi ekki af okkur Guðrúnu fyrr en við mættum henni á innritunarborðinu í KEF. Við vorum í viku á Krít þar sem við lágum í sólbaði, sáum drauga, lásum bækur (aðallega Plúsferðabæklinginn samt) og gerðum gloríur á bílaleigubíl... ég dó næstum því úr hræðslu þegar Guðrún þurfti að bakka ca 0,5 km á einbreiðum malavegi efst upp í fjalli. Ég gekk með bílnum og Sunnefa gædaði um topplúguna. Myndir koma fljótlega eða bara þegar ég nenni ...

Annars fórum við mútta með Óla frænda og krökkunum norður um síðustu helgi. Ég keyrði allt liðið á Fordinum hennar Maju, þvílík draumadós - mig langar í Ford Explorer þegar ég verð rík. Eigum við eitthvað að ræða það hvað það er gott að keyra þetta tæki? En nú er komin pása á sumarfríið, ég er sest að upp í Odda - að sjálfsögðu um leið og Helgi fer út hahha - en planið er að vera komin með góða mynd á ritgerðarskrímslið þegar ég mæti aftur í vinnu í ágúst. María brillerar á námskeiðum út um allan bæ og við dúllumst saman á kvöldin. Eníveis, ég hendi myndum inn þegar ég nenni

Sýnishorn úr giftingarveislunni

2008-06-24T23:44:00.008Z

Fanney Dóra og Jóhanna - eldhressar Anna Rósa veislustjóri og Heimir tónlistarstjóri

Heimir og Snorri spiluðu undir á gítar langt fram undir morgun

Brúðhjónin sungu að sjálfsögðu með

Addi tók snilldartakta - spurning um að blasta videoinu af kauða hér inn?

Fleiri myndir koma svo seinna...

Ó já...

2008-06-23T13:08:00.004Z

Jæja, það er ástæða fyrir því að ég er/var þunn, þreytt og hölt í gær. Á föstudagsmorgun skundaði ég norður á Akureyrina, ferðin gekk nokkuð vel og ég keyrði í geggjuðu veðri alla leiðina með Super Mama Djumbo í botni.

---

Föstudagurinn fór í undirbúning fyrir partý aldarinnar, Valla og Addi gengu í það allra heilagasta í apríl og héldu upp á það á laugardaginn. Ofurkonurnar, ég og Valla, fóru snemma í háttinn með nýplokkaðar augabrúnir. Fyrri partur laugardagsins fór svo í að klára undirbúninginn, Chile salatið sló í geng - ótrúlega gott með grillmatnum.

---

Kl 17.00 - Fyrstu gestir mæta á svæðið. Ásdís er enn að taka sig til.

kl. 17.30 - Fleiri gestir mæta. Ásdís brunar út í búð að kaupa innlegg í skóna hjá henni og Völlu

kl. 18.00 - Skálað í fyrsta freyðivínsglasinu, stuttu seinna í glasi nr. 2 og aðeins seinna í glasi nr. 3

kl. 18.30 - Matur - engin steinselja varð eftir í tönnum

kl. 19.00-22.30 - Unnið hörðum höndum að því að tapa sjarmanum. Skemmtilegar ræður og skemmtatriði, mikið hlegið og sungið.

kl. 22.36 - Sjarminn farinn. Friðrik hellir yfir Ásdís rauðvíni. Ásdís skiptir um skyrtu. Haldið áfram að syngja

kl. 03.00 - Rölt af stað í bæinn, farið á Karolínu. Ásdísi langaði að dansa. Hringdi í Önnu Rósu, Önnu Beggu, 118 og eitthvað nr sem hún þekkir ekki.

kl. 03.31 - Ásdís fer af Karolínu og hitti fyrrv einnar úr vinahópnum. Hann elskaði hana víst alveg rosalega mikið. Ásdís þurfti að flýta sér á Kaffi Ak áður en það lokaði. Hljóp berfætt.

kl. 03.38 - Ásdís komin á Kaffi Ak. og dansar með Önnu Beggu og Önnu Rósu, fékk heimboð frá einum 21 árs - afþakkaði það.

kl. 03.45 - Ásdís varð pirruð

kl. 04.00 - Ásdís ætlar með Önnu Beggu á barinn, týndi henni á leiðinni. Fór samt á barinn. Ljósin voru kveikt. Hitti Sæsa, fór aftur á barinn.

kl. 04.15 - Ásdís fór á Hlölla

kl. 04.30 - Ásdís leggur af stað heim í Vanabyggðina, berfætt. Deyr úr hlátri í Skátagilinu.

kl. 05.00 - 05.30 - Ásdís farin að nálagast Vanabyggðina, tapaði sér í símanum - hringdi út um allt.

kl. 05.32 - Ásdís leggst til hvílu í öllu nema skónum

kl. 09.30 - Ásdís vaknar að kafna úr hita. Fer í stofuna, úr lopapeysunni og heldur áfram að sofa.

---

Ótrúlega skemmtilegt kvöld og frábær helgi, heimferðin var erfið - ég ætla ekki að reyna að ljúga. Ég stoppaði á Öxnadalsheiðinni, í Varmahlíð, á Blönduósi, í Víðidalnum, í Staðarskála og í Borgarnesi. Mikið hlegið - mikið sungið. Ég elska Akureyri - það er alltaf svo gaman þar

Ég er...

2008-06-22T23:43:00.000Z

... hölt, þunn og þreytt eftir frábæra helgi.

Talarðu íslensku?

2008-06-18T10:04:00.002Z

... var fyrsta spurningin sem ég fékk þegar ég settist með tölvuna og vinnudótið mitt á Hressó nú í morgun. Mér er spurn, lít ég út fyrir að vera voðalega útlensk? Kauða vantaði að vita landsnúmerið fyrir Ísland og taldi víst að ég vissi það ekki fyrst ég væri íslensk.... Hann er sjálfur Íslendingur.

---

Ég prufaði að vera 3ja barna móðir um helgina, ég var í Hafnarfirðinum með Maríu, Önnu og Ottó. Ég fór aðeins í búð á sunnudaginn og fékk pössun fyrir börnin, ég hreinlega nennti ekki að smala öllum í bílinn og fara á milli verslana með þau. Ég tek ofan af fyrir þeim mæðrum sem geta átt 3 börn, haldið sómasamlegt heimili og litið þokkalega út. Ég var eins og drusla og átti fullt í fangi með að halda heimilinu sæmilegu. Þau eru samt svo mikil yndi öll saman, eins og systkini - flott systkini.

---

Við mægður kíktum svo í Hafnarfjörðinn í gær og tókum þátt í smá hátíðarhöldum þar, reyndar lögðum við bílnum á kolvitlausum stað svo meirihlutinn af deginum fór í labb. Þreyttar lappir lögðu sig svo í gærkvöldi með Maríu, við horfðum aðeins á imbann saman en barnið er alveg húkkt á "Age of Love" - skilur reyndar ekkert út á hvað hann gengur en vill alltaf horfa á hann með ástsjúku móðurinni.

---

Annars er snúllan mín að fara til pabba síns á föstudag og kemur ekki aftur til mín fyrr en 2.júlí. Mér finnst það ansi langur tími en hún á eftir að skemmta sér vel, þau hafa líka gott af því að vera saman lengur en 4 daga í einu. Hún verður á leikjanámskeiði í næstu viku svo það kemur í hans verkahring að græja hana fyrir það. Ég er ekki hrifin af svona "pabbahelgarpartýum" og við Nonni höfum lagt áherslu á að hún kynnist daglegu lífi hjá okkur báðum þó hún geri nú fleiri skemmtilegri hluti með honum heldur en með mér. En ég á samt eftir að sakna hennar alveg þvílíkt mikið.

---

Nóg af tuði, Akureyrin á föstudag - ég bara elska Akureyrina og fólkið mitt þar. Partý aldarinnar verður svo á laugardaginn þar sem ég verð salatmeistarinn - smátt skorið!

Af ljótunni og öðrum skemmtilegheitum

2008-06-09T23:23:00.003Z

Þá er kominn einn einn mánudagurinn, síðasti mánudagurinn minn í vinnunni þar til í ágúst. Næsta mánudag verð ég komin í leyfi og flutt upp á 3.hæð í Odda. Reyndar skýst ég nokkrum sinnum á fundi út í Gimli og sennilegast á ég nú eftir að heimsækja kerlingarnar mínar nokkrum sinnum til að spjalla. Þrátt fyrir að hafa nánast búið í vinnunni síðustu vikur þá eru enn nokkur verkefni sem ég á eftir að klára. Svo er það blessuð MA ritgerðin sem fær að njóta krafa minna í sumar.

---

Annars vaknaði ég með ljótuna í morgun, á háu stigi. Ég vaknaði of seint til að ná að maka henni af mér svo ég hljóp(keyrði) bara í vinnuna, ég hugsaði með mér að ég ætti hvort sem er eftir að vera lokuð inni á skrifstofu í allan dag í samlestri vegna brautskráningarinnar en annað kom á daginn. Þau fáu skipti sem ég var frammi hitti ég fullt af fólki, fólki sem mig langaði ekkert að hitta með ljótuna. Það er svo týpískt. Húðin á mér er öll í fokki, þurrkublettir og bólur og augabrúnirnar eru ekki til umræðu. Ég held að fína andlitskremið mitt sem ég sjoppaði úti á Tenerife sé að gera mér einhvern óleik, spurning um að skipta bara í Nivea - það virkar alla vega fínt.

---

Næst á dagskrá er að ná ljótunni af fésinu áður en ég fer til Akureyrar, koma mér í lærdómsgírinn, undirbúa nokkur viðtöl og missa nokkur kg - öll töfrabrögð í þeim efnum eru vel þegin.

Sleepy sunday

2008-05-25T22:46:00.007Z

Í dag er sunnudagur, crazy vinnuvika að baki og önnur crazy að banka upp á. Ég held ég hafi sjaldan verið eins þreytt eins og á föstudagskvöldið þegar ég hlunkaðist til Maju að passa, ég svaf á mínu græna alla nóttina og eins og góðri barnapíu sæmir vaknaði ég ekki við börnin um morguninn heldur svaf til hádegis... Ég fór þá heim og sofnaði aftur.

Guðrún bauð okkur Sunny í Eurógrill í gærkvöldi, kvöldið var rosalega fínt í alla staði en ég komst aldrei í partýgírinn - þetta var bara eitt af þessum kvöldum. Ég var bara ógeðslega þreytt og fór snemma heim. Ég svaf í pörtum fram undir morgun, og lagði mig svo aftur seinni partinn - það er svo gott að sofa þegar maður er freyttur skratti.

Ég verð svo eiðarlaus á sunnudagskvöldum - ég skil þetta ekki. Mig langar að Vallan mín búi hérna í húsinu og komi með mér á kaffihús og ræði helstu málefnin eins og í den... bara einn bolli - það var næs. Ohh mig langar á kaffihús núna.

---

En hvernig líst ykkur annars á þessa mynd af mér og Nonna í útskriftinni minni í október 2005??? Við skulum hafa það á hreinu að ég er bara 24 ára þarna.... Af hverju sagði enginn neitt? Ég er hræðileg á þessum myndum

It´s complicated....

2008-05-18T23:28:00.004Z

Mér leiðist, ég nenni ekki að fara að sofa en ég veit að ég ætti að gera það - mér leiðist of mikið til að nenna í rúmið. Mig langar svo margt og hugurinn er all over the place

Mig langar að kaupa mér ný húsgögn, en why? ég er að fara flytja eftir hálft ár
Mig langar að flytja en ég hef ekki efni á því
Mig langar að mála íbúðina en ég má það ekki
Mig langar að búa á Akureyri en mamma og Mæja þurfa þá að flytja líka
Mig langar að í augnbrúnatattú, gervineglur, sílikón og sixpakk en ég nenni ekki að hreyfa mig og hitt er of dýrt til að spreða í það svona á sunnudegi
Mig langar að læra eitthvað annað en fötlunarfræði en ég er samt eiginlega búin með hana. Mig langar í stjórnmálafræði en það er fáránlegt að vera með 2 BA próf
Mig langar að fara til útlanda í nám en það er bara svo flókið og dýrt
Mig langar í stelpuferð til útlanda en bara
Mig langar að vera sjálfstæð og geta gert allt sem mig langar til

Hvað skal mann þá gjöra? ohhh

Akureyrin og gamli skrafurinn

2008-05-17T21:04:00.004Z

Það var geðveikt á Akureyri - viðbjóðslegt veður á leiðinni en frábært á Eyrinni. Fermingin var fín, áfengið rosalega fínt og félagsskapurinn rosalega góður. Myndirnar eru hér... --- En ég bara varð að stela þessum brandara af öðru bloggi Kona nokkur ákveður að fara í andlitslyftingu á afmælisdegi sínum, eyðir í það 500.000 krónum og er bara nokkuð ánægð með árangurinn. Á leiðinni heim kemur hún við í hreinsun og hreinlega getur ekki hamið sig og spyr afgreiðslumanninn, "Hve gömul myndir þú halda að ég sé"? "Svona 32 segir maðurinn". "Ég er reyndar 47", segir konan ánægð. Skömmu síðar er konan stödd á veitingastað og spyr þjóninn "Hve gömul myndir þú halda að ég sé"? "Þú ert svona 29 ára", svarar þjónninn. "Ekki aldeilis, ég er 47 ára" segir konan og glottir við tönn. Konan er orðin virkilega ánægð með þessa ákvörðun sína og þar sem hún stendur fyrir utan veitingastaðinn og bíður eftir leigubíl getur hún ekki á sér setið og spyr eldri mann sem stendur við hlið hennar. "Hve gömul myndir þú halda að ég sé"? Hann svarar, "Ég er 78 ára sjálfur og sjónin er farin að daprast. En ég komst að því sem ungur maður að það er til örugg aðferð til að segja til um aldur kvenna. Ég þarf þó að lauma hendinni ofan í buxurnar þínar til þess að finna þetta út, en þá veit ég það nákvæmlega. Eftir mikla umhugsun konunnar segir konan afar forvitin, "jú, jú, kannaðu það sem kanna þarf". Gamli maðurinn bíður ekki boðanna og setur höndina mjúklega ofan í buxur konunnar, fyrst annarri og síðan báðum og kannar þessi ókunnu lönd af mikilli gaumgæfni og segir svo, "þú ert 47 ára". Konunni verðu mikið brugðið og segir það hárrétt en spyr líka hvernig í áranum hann hafi farið að þessu. Gamli maðurinn svarar, "Ég sat á næsta borði við þig á veitingastaðnum hérna áðan".

Akureyris og stjörnunar

2008-05-09T16:16:00.002Z

Jamms, mín er að fara að leggja í hann til Akureyris... færðin er ekta ég, hálka og éljagangur - lovly. Stjörnurnar eru fyndnar í dag, ég flétti upp stjörnuspánni minni eins og ég geri ansi oft. Sunny, um hvað vorum við að tala í gær? Naut: Þú ert klár og heilbrigður í kollinum, og langar að eiga viðskipti við þína líka. Það er ekkert skrýtið, en einhver öfl eru vilja endilega stríða þér. hahhahahaha

Hamstraslys og kynlíf

2008-04-30T23:06:00.001Z

Hamsturinn okkar, hún Stjarna, lenti í alvarlegu slysi í dag (eða gær... donnó - dýrið er ekki í uppáhaldi). Þegar ég kom heim í dag heyrði ég hana væla í búrinu sínu og þeir sem eiga hamstra vita sennilega að sjaldnast heyrast hljóð frá þeim. Nema hvað þegar ég leit á dýrið var það búið að festa sig í búrinu á öðrum fætinum. Með snarræði vippaði ég mér í þvottapoka og hóf björgunarstörf. Dýrið er þekkt fyrir að bíta ansi hressilega á ólíklegustu tímum svo ég tók enga sénsa með sárþjáð dýrið. Ég náði að losa greyið en hún átti mjög erfitt með gang, haltraði og átti í mesta basli með að koma sér áfram. Samviskubitið yfir því hvað ég hef hugsað illa um greyið drap mig næstum því svo það var brunað út í búð og keypt nýtt búr sem ómögulegt er að slasa sig í, fullt af vítamínum, nammi og hamstraleikföngum. Dýrið er aðeins að braggast núna, hleypur á þremur fótum og leikur sér í nýja dótinu. --- En kynlífið, ég held ég sé alveg búin að gefa það upp á bátinn að fara í doktorsnám. Meistari Leno "kynnti" niðurstöður nýrrar könnunar í þættinum áðan og þar kom fram að eftir því sem gáfaðari konur væru því lélegri væru þær í rúminu og ættu erfiðara með að fá fullnægingu. Tek hann á orðinu, algjörlega.

Sumarið komið...

2008-04-25T00:47:00.002Z

Sumri var fagnað með viðeigandi hætti í dag... í kulda og rigninu. Merkilegt að við skulum halda upp á þennan dag, ég man ekki eftir sumarlegu veðri þennan dag alla mína tíð. En það að sumardagurinn fyrsti sé að kvöldi kominn þýðir að.... ..... fullt af grunnskólanemendum eru að læra fyrir samræmd próf ..... fullt af háskólanemendum eru að læra fyrir vormissserispróf ..... fullt af háskólanemendum eru að fá magasár yfir lokaritgerðunum sínum og og og það sem mestu máli skiptir..... ég á afmæli eftir 2 daga!

Brjóst eru bara brjóst

2008-04-01T11:57:00.005Z

"Femínistafélag Íslands stendur fyrir mótmælum gegn hlutgervingu kvenlíkamans í Vesturbæjarlauginni kl. 17.00 í dag. Klámfengnar myndir af stöðluðum konum tröllríða fjölmiðlum og almannarými, þó fátt sé fegurra en kvenlíkaminn í öllum sínum fjölbreytileika. Að skylda konur til að hylja brjóst sín í sundi lýsir lostafullum kenndum þeirra sem reglurnar setja. Nú er kominn tími til að konur skilgreini eigin líkama upp á nýtt og ákveði sjálfar hvort brjóst þeirra skuli hulin eður ei.

Konur - mætum berar að ofan í sund kl. 17.00 í dag"

Ég veit ekki stelpur - en ég er of sperhrædd til að mæta, silicon myndi kannski redda því :) Sennilegast er það frúin sem var rekin úr sundlauginni í Hveró sem startaði þessu

Brilliant kvöld

2008-03-30T23:04:00.002Z

... á föstudaginn eftir vinnu komst að því að partý sem ég hélt að búið væri að cancela væri on. Ég var ekki í stemmaranum en ákvað nú samt að kíkja og ég hef sjaldan hlegið eins mikið, drukkið eins mikið og sofnað eins seint. Við Guðrún fengum Gunna til að keyra okkur upp í Mosó því gamli vinahópurin ætlaði að hittast og tjútta saman. Mæting var heim til Sigga Palla sem var í gamla daga íbúðin hans Davíðs Jóns - án gríns þá vorum við ekki alveg að rata þetta en komumst þó á leiðarenda. Heim til Sigga Palla komu Erna, Kolla Svans, Davíð Jón, Anna Heidi, Siggi Valli, Svanni og einhverjir fleiri (less important people hahha) --- Gamlar myndir, gamlar minningar - margar tengdar þessari blessuðu íbúð- og börnin okkar voru umræðuefnið. Frá Sigga Palla fórum við á Players þar sem ég hitti konu úr uppeldisfræðinni sem ég lofaði að skipuleggja hitting fyrir (Hildur, Valla, Ingunn og þið uppeldisfræðiskvísur - við eigum að fara að hittast). Af Players fórum við upp í Mosó heim til Davíðs Jóns þar sem setið var og borðað og drukkið milli þess sem við grétum úr hlátri til að vera sjö. --- Eníveis, frábært kvöld. Takk allir saman - myndirnar eru hér - ritskoðaðar :)